မုံရွာအကျဥ်းထောင်တွင် အကျဥ်းသားအချို့ဆန္ဒထုတ် ဖော်နေကြပြီး စစ်ကောင်စီက အကြမ်းဖက်ထိန်းချုပ်ရန် ကြိုးစားနေသည်ဟု ဒေသခံအချို့က ပြောသည်။
စစ်ကောင်စီက ဖမ်းဆီးထားပြီး မုံရွာထောင်တွင် ချုပ်နှောင်ခံထားရသူအချို့က ယနေ့(ဧပြီ ၃ရက်) ညနေ ၅နာရီခန့်ကစတင်ကာ ဆန္ဒထုတ်ဖော်နေခြင်းဟု ဒေသခံတစ်ဦးကပြောသည်။
“ထောင်အတွင်းထဲကနေ ဆူညံသံတွေ ကြားနေရတယ်။ သေနတ်ပစ်သံတွေလည်း ကြားလိုက်တယ်။ အခြေအနေက ရှုပ်ထွေးနေတယ်” ဟု ဒေသခံတစ်ဦးက ပြောသည်။
မုံရွာအကျဥ်းထောင်အတွင်းဘက်မှ ညနေ၄နာရီ ၄၉မိနစ်ကစတင်ကာ ဆန္ဒထုတ်ဖော်သံများကြားရပြီး ညနေ ၅နာရီ ၁၂မိနစ်တွင် သေနတ်ပစ်ခတ်သံများထွက်ပေါ်လာခဲ့သည်ဟု မုံရွာမြို့နယ်သတင်းမှန်ပြန်ကြားရေးဖေ့စ်ဘွတ်ခ်စာမျက်နှာက ဖော်ပြထားသည်။
Public Service Announcement
အကျဥ်းထောင်အတွင်းသို့ လူနာတင်ကားနှင့် ဆေးရုံကားအချို့ မောင်းဝင်သွားကြောင်းနှင့် ညနေ ၅နာရီ ၅၈မိနစ်တွင် 40 MM လောင်ချာ ပစ်ခတ်သံကြားရသည်ဟုဆက်လက် သတင်းထုတ်ပြန်ထားသည်။
မုံရွာထောင်အတွင်း အကျဥ်းကျနေသည့် အပြစ်မဲ့ ပြည်သူများသည် စစ်ကောင်စီ၏ ညှင်းပန်းနှိပ်စက်မူ့တွေကြောင့် ဆန္ဒထုတ်ဖော်ခြင်းဟုလည်း မုံရွာအခြေစိုက် ပြည်သူ့ကာကွယ်ရေးအဖွဲ့များ၏ သတင်းထုတ်ပြန်ရေးဖေ့ဘွတ်ခ်စာမျက်နှာဖြစ်သည့်မုံရွာမြို့နယ်သတင်းမှန်ပြန်ကြားရေးက ရေးသားထားသည်။
မုံရွာအကျဥ်းထောင်တွင် စစ်ကိုင်းတိုင်းဝန်ကြီးချုပ်ဒေါက်တာမြင့်နိုင်အပါအဝင် ဖမ်းဆီးခံထားရသည့် တိုင်းအစိုးရအဖွဲ့ဝင်များ၊ နာမည်ကြီးသပိတ်ခေါင်းဆောင် ကိုဝေမိုးနိုင်၊ ကိုဟန်ဇာမြေမွန်တို့လည်း ထိန်းသိမ်းခံထားရသည်။
အသေးစိတ်အခြေအနေကို ဆက်လက်ဖော်ပြပါမည်။
