စစ်ကောင်စီက နိုင်ငံခြားငွေအကောင့်များမှဒေါ်လာများကို တစ်ရက်အတွင်းပြောင်းရမည်ဆိုသော ညွန့်ကြားချက်ကို မြန်မာနိုင်ငံဆိုင်ရာ ဂျပန်သံရုံးက ကန့်ကွက်လိုက်ပြီး ဂျပန်သံရုံးနှင့်ဂျပန်လုပ်ငန်းများကို ကင်းလွတ်ခွင့်ပေးရန် ဧပြီ ၄ ရက်စွဲဖြင့်တောင်းဆိုထားသည်။
မြန်မာနိုင်ငံတွင် လုပ်ကိုင်နေသော ဂျပန်ကုမ္ပဏီများသည် စစ်ကောင်စီကထုတ်ပြန်ချက်ကို လိုက်နာရန် ကြီးမားသောစိန်ခေါ်မှုများနှင့် ရင်ဆိုင်ရမည်ဖြစ်သည်ဟု ဂျပန်သံရုံးက ဆိုသည်။
ထိုကန့်သတ်ချက်သည့် ဂျပန်သံရုံးလုပ်ငန်းများ၊ ဂျပန်စီးပွားရေးလုပ်ငန်းများ ဆက်လက်လုပ်ကိုင်ရန် အခက်အခဲများရှိလာနိုင်သည်ဟုလည်း ဂျပန်သံရုံး၏ ထုတ်ပြန်ချက်တွင် ဖော်ပြသည်။
ထိုကြောင့်နှစ်နိုင်ငံ အပြန်အလှန်ဆက်ဆံရေးကို ဆက်လက်ထိန်းသိမ်းရန် ဂျပန်သံရုံး၊ဂျပန်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ (JICA)၊ ဂျပန်ပြည်ပကုန်သွယ်မှုအဖွဲ့ (JETRO)စသည့် အဖွဲ့အစည်းများကို ကင်းလွတ်ခွင့်ပြုရမည်ဟု ဂျပန်သံရုံးကဆိုသည်။
Public Service Announcement
အကြမ်းဖက်စစ်ကောင်စီက ပြည်တွင်းရှိ နိုင်ငံခြားငွေ ဘဏ်အကောင့်များသို့ ရောက်ရှိလာသည့် နိုင်ငံခြားငွေများကို တစ်ရက်အတွင်း ဒေါ်လာမှ ကျပ်ငွေကိုပြောင်းလဲရမည်ဟု ဧပြီ ၃ ရက်က ထုတ်ပြန်ကြေညာခဲ့သည်။ ထိုသို့ပြောင်းလဲရာတွင် စစ်ကောင်စီ သတ်မှတ်ထားသည့် တစ်ဒေါ်လာလျှင် ၁၈၅၀ကျပ် နှုန်းဖြင့်သာ ဘဏ်များကို တိုက်ရိုက်ရောင်းချရမည်ဟုလည်းဆိုသည်။
စစ်ကောင်စီက အဆိုပါ သတ်မှတ်ချက်ကို မလိုက်နာပါက ၎င်းတို့စိတ်ကြိုက်ပြင်ဆင်ထားသည် နိုင်ငံခြားသုံးငွေစီမံခန့်ခွဲမူ ဥပဒေဖြင့်အရေးယူမည်ဟုခြိမ်းခြောက်ထားသည်။ ထိုဥပဒေတွင် ၎င်းတို့ ထုတ်သမျှ အမိန့်များကိုမနာခံပါက ထောင်တစ်နှစ် သို့မဟုတ် ငွေဒဏ်ချမည်ဟုဆိုသည်။
“ဂျပန်တွေက ဒီဧပြီလထဲမှာ လုပ်ငန်းတွေ ပြန်စဖို့ လုပ်နေကြတာ။ ဒီအချိန်မှာ စစ်ကောင်စီက အတင်းကျပ်လုပ်လိုက်တော့ ဂျပန်တွေလဲ အလုပ်ရှုပ်သွားတဲ့ သဘောပေါ့”ဟု ဂျပန်အဖွဲ့အစည်းတခုတွင်လုပ်ကိုင်နေသူတစ်ဦးကပြောသည်။
ဂျပန်သံရုံးသည် စစ်ကောင်စီနှင့် နီးစပ်မှုရှိပြီး ၂၀၂၁ စစ်တပ်အာဏာသိမ်းပြီးနောက် စစ်တပ်က ခန့်အပ်ထားသည့် နိုင်ငံခြားရေးဝန်ကြီးကို ပထမဦးဆုံးသွားရောက်တွေ့ဆုံခဲ့သော သံအမတ်မှာ ဂျပန်သံအမတ်မာရုယာမဖြစ်သည်။ထိုအပြင် အကြမ်းဖက်စစ်ကောင်စီ၏ အာဏာသိမ်းမှုအပေါ်ဂျပန်ကအစောပိုင်းတွင်သာကန့်ကွက်မှုပြုလုပ်ခဲ့သော်လည်းစစ်ကောင်စီအပေါ် အရေးယူပိတ်ဆို့ဒဏ်ခတ်အရေးယူမှုတစ်ခုမျှမလုပ်သေးပေ။ထိုအပြင် ဂျပန်အထူးကိုယ်စားလှယ် ဆာဆာကာဝါသည် အာဏာသိမ်းခေါင်းဆောင်မင်းအောင်လှိုင်နှင့် ရင်းနှီးပြီး စစ်ကောင်စီနှင့် တိုင်းရင်းသားလက်နက်ကိုင်အဖွဲ့ များဆွေးနွေးရန်ကြားကဆောင်ရွက်ပေးနေသူတစ်ဦးဖြစ်သည်။
