စစ်ကိုင်းတိုင်း ကလေးမြို့တွင် နေအိမ်ပြင်ပသို့ ထွက်သွားပြီးနောက် ပျောက်ဆုံးနေသည့် လူငယ်အမျိုးသားတစ်ဦးကို သေနတ်ဒဏ်ရာများနှင့် အကြမ်းဖက်စစ်ကောင်စီ၏ စစ်ဆေးရုံ၌ သေဆုံးလျက် ပြန်တွေ့ခဲ့သည်။
ကလေးမြို့၊ တာဟန်းရပ်ကွက် နယ်မြေ (၁၀)တွင်နေထိုင်သော (၂၃)နှစ်အရွယ် ကိုလျန်သည် ဧပြီ ၈ရက်က ပျောက်ဆုံးသွားခြင်းဖြစ်သည်။
“ဆိုင်ကယ်နဲ့ စျေးထွက်ဝယ်တာ။ ပြန်ရောက်မလာတော့ လူပျောက်ကြော်ငြာထားသေးတယ်။ ဆုတောင်းမပြည့်ခဲ့ပါဘူး။ ရင်ခွဲရုံမှာ အလောင်းပဲ ပြန်တွေ့တယ်”ဟု ကိုလျန်၏ အိမ်နီးချင်းတစ်ဦးက ပြောသည်။
ကိုလျန်၏ ရုပ်အလောင်းကို ဧပြီ ၁၀ရက်ညနေတွင် ပြန်တွေ့ခြင်းဖြစ်သည်။ ခြေထောက်တွင် သေနတ်ဒဏ်ရာရရှိိထားပြီး မျက်နှာနှင့် ခန္တာကိုယ်တွင် ဖူးရောင်ဒဏ်ရာများတွေ့ရသည်ဟု မြို့ခံများက ဆိုသည်။ ကိုလျန်၏ စျာပနကို မိသားစုနေအိမ်တွင် ယနေ့ ပြုလုပ်မည်ဖြစ်သည်။
ကလေးမြို့နယ်တွင် ကိုလျန်အပြင် ပျောက်ဆုံးနေသူလူငယ်အချို့လည်း ကျန်ရှိနေသေးသည်ဟု မြို့ခံအချို့က ပြောသည်။
Public Service Announcement
ကလေးမြို့နယ်အတွင်း ပြည်သူ့ကာကွယ်ရေးအဖွဲ့များနှင့် အကြမ်းဖက်စစ်ကောင်စီတပ်တို့ တိုက်ပွဲများဖြစ်နေပြီး အရပ်သားများကို စစ်ကောင်စီက ဖမ်းဆီးခြင်း၊သတ်ဖြတ်ခြင်း၊ ငွေကြေးဖြင့် ပြန်ရွေးခိုင်းခြင်းများ ရှိနေသည်ဟု ဒေသခံများက ပြောသည်။
