ကလေးမြို့ နတ်ချောင်းရွာကို အ​ကြမ်းဖက်စစ်ကောင်စီတပ် ထပ်မံမီးရှို့ ဖျက်ဆီးနေ

စစ်ကိုင်းတိုင်း ကလေးမြို့နယ်ရှိ နတ်ချောင်းကျေးရွာကို အကြမ်းဖက် စစ်ကောင်စီတပ်က ယနေ့ (ဧပြီ ၁၁ရက်)နံနက်မှစတင်ကာ နောက်တစ်ကြိမ် မီးရှို့ဖျက်ဆီးနေသည်ဟု စစ်ဘေးရှောင်နေရ သူများက ပြောသည်။

စစ်ကောင်စီတပ်ရန်ကြောင့် ဒေသခံများနေရပ်စွန့်ခွာထွက်ပြေးနေရသည့်နတ်ချောင်းကျေးရွာကို အကြမ်းဖက်စစ်ကောင်စီက ယနေ့နံနက်ကစ၍ မီးရှို့နေခြင်းဖြစ်သည်။

“မနေ့တည်းက စစ်ကြောင်းတွေ့လို့ စိတ်ပူနေတာ။ ထုံးစံအတိုင်း ဒီမနက် မီးရှို့နေပြီ။ ရွာဘက်ကနေ တက်လာတဲ့ မီးခိုးလုံးမြင်ရတိုင်း အသဲနာတယ်”ဟု အဆိုပါရွာနှင့် မလှမ်းမကမ်းရှိ တောင်ယာတွင် စစ်ဘေးရှောင်နေရသူတစ်ဦးက ပြောသည်။

အိမ်ခြေ နှစ်ထောင်နီးပါးရှိသော နတ်ချောင်းရွာကို စစ်ကောင်စီတပ်က ၂၀၂၁ ဒီဇင်ဘာက စတင်ကာ အကြမ်းဖက်ဖျက်ဆီးနေခြင်းဖြစ်သည်။ ​ဒေသခံ ၃၀ဦးထက်မနည်းကိုလည်း သတ်ဖြတ်ခဲ့သည်။ ဒေသခံများသည် ရွာတွင်မနေရဲ၍ တောင်ယာများတွင် တဲတိုး၍ စစ်ဘေးရှောင်နေကြရသည်။

Public Service Announcement

ယခုတစ်ကြိမ်နှင့်ဆိုလျှင် ငါးလခန့်အတွင်း လေးကြိမ်မီးရှို့ဖျက်ဆီးခံရခြင်းဟု ဒေသခံများက ပြောသည်။

ပြီးခဲ့သည့် မတ်လ ၁၆ရက်က မီးရှို့ဖျက်ဆီးရာတွင် နေအိမ် ၄၀နီးပါး မီးထဲပါသွားသလို ရွာလမ်းမပေါ်တွင်လည်း”လိုရာဆုတောင်း” ဟူသော စာကို ကတ္တရာလမ်းပေါ်တွင် စစ်ကောင်စီ တပ်တပ်ကရေးပြီး လူထုကို စိန်ခေါ်ခဲ့သည်။

“လက်နက်ကြီးနဲ့ထု၊ ပြည်သူက လန့်ထွက်ပြေး၊ ထွက်ပြေးရတဲ့အိမ်တွေက ပစ္စည်းခိုး၊ တွေ့တဲ့လူသတ်ပြီး PDF လို့ပြော၊ တွေ့ကရာအိမ် မီးရှို့၊ ဘာအဖွဲ့မျိုးဖြစ်မလဲ”ဟု စစ်ဘေးရှောင်နေရသူတစ်ဦးက စစ်ကောင်စီကို ရှုတ်ချပြောဆိုသည်။

နတ်ချောင်းရွာသည် ချင်းတောင် ဝေဘူလမြို့ထိ ကားလမ်းတစ်ဆက်တည်း ပေါက်ပြီး အချက်အချာကျ၍ စစ်ကောင်စီက စစ်ကြောင်းထိုးနေခြင်းဖြစ်သည်။ သို့သော် ပြည်သူ့ ကာကွယ်ရေးအဖွဲ့များက နည်းမျိုးစုံဖြင့် ခုခံနေ၍ စစ်ရေးအခြေအနေ ထင်တိုင်းမပေါက်သည့် စစ်ကောင်စီက အရပ်သားများကို အငြိုးထားနေခြင်းဟု ကလေးမြို့ခံများက ပြောသည်။