မန္တလေးတိုင်း၊ နွားထိုးကြီးမြို့နယ်တွင် မိုင်တဲတာဝါတိုင်အနီး ဖြတ်မိသည့် နွားကျောင်းသားတစ်ဦး စစ်ကောင်စီတပ်ထောင်ထားသောမိုင်းနင်းမိ၍ ခြေတစ်ဖက်ပြတ်သွားပြီး အကြမ်းဖက်စစ်ကောင်စီတပ်က ၎င်းတို့မိုင်းပျက်စီးသွား၍ လျော်ကြေး ၆ သိန်းကျပ် ပြန်တောင်းသွားကြောင်း ဒေသခံများက ပြောသည်။
ပြီးခဲ့သည့် ဧပြီလ ၉ ရက်နေ့ နံနက် ၁၁ နာရီခန့်က နွားထိုးကြီးမြို့နယ်၊ ကျီးကန်ရွာ အနီးရှိ အကြမ်းဖက်စစ်တပ်ပိုင် မိုင်တဲတာဝါတိုင်အနီး၌ နွားကျောင်းသည့် လူငယ်တစ်ဦး ဖြတ်သန်းသွားရာ မိုင်းပေါက်ကွဲပြီး နွားကျောင်းသမား ခြေတစ်ဖက်ပြတ်သွားကြောင်း၊ ထိုဖြစ်စဥ်တွင် အကြမ်းဖက်စစ်ကောင်စီတပ်မှ ခြေပြတ်သွားသည့် နွားကျောင်းသမားထံမှ လျော်ကြေး ၆ သိန်း တောင်းခဲ့ပြီး မပေးလျှင် ထောင်ချမည် ခြိမ်းခြောက်ခဲ့သည်ဟု သိရကြောင်း ဒေသခံများက ပြောသည်။
အကြမ်းဖက်စစ်ကောင်စီသည် ၎င်းတို့ပိုင်ဆိုင်သည့် မိုင်တဲတာဝါတိုင်များ မကြာခဏဖျက်ဆီးခံနေရ၍ တာဝါတိုင်အနီးမိုင်းများ ထောင်ထားလေ့ရှိကြောင်း၊ နွားကျောင်းသားမှာ သတိလက်လွတ်ဖြစ်ပြီး ဖြတ်မိရာမှ မိုင်းနင်းမိကာ ပေါက်ကွဲသွားခြင်းဖြစ်ကြောင်း ဒေသခံများက ပြောသည်။
အဆိုပါဖြစ်စဥ်ဟုတ်မှန်ကြောင်း နွားထိုးကြီး PDF အဖွဲ့မှရဲဘော်တစ်ဦးက အတည်ပြုပြောကြားသည်။
Public Service Announcement
မန္တလေးတိုင်း၊ မြင်းခြံခရိုင်အတွင်းရှိ မြင်းခြံ၊ တောင်သာ၊ နွားထိုးကြီးမြို့နယ်များသည် အကြမ်းဖက်စစ်ကောင်စီအား ခုခံတိုက်ခိုက်နေသည့် PDF များအားကောင်းရာ နယ်ဒေသများဖြစ်သည်။
