အမေရိကန်သို့ရောက်ရှိနေသော NUG ကိုယ်စားလှယ်အဖွဲ့နှင့် နယူးယောက်မြန်မာမိသားစုများ တွေ့ဆုံပွဲတွင် ရေးသားထားသော Slogan စာသားနှင့်ပတ်သက်၍ လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက တောင်းပန်လိုက်သည်။
ဧပြီ ၁၃ ရက်က ဝန်ကြီးဦးအောင်မျိုးမင်းဦးဆောင်သော ကိုယ်စားလှယ်အဖွဲ့နှင့် နယူးယောက်မြို့ရှိ မြန်မာမိသားစုတို့တွေ့ဆုံပွဲတွင် ‘Denying NUG is Denying Democracy’(NUG ကို ငြင်းပယ်ခြင်းက ဒီမိုကရေစီကို ငြင်းပယ်ခြင်းဖြစ်သည်)စာသားကို ဝန်ကြီးများရှင်းလင်းပွဲခုံရှေ့၌ ထားရှိခဲ့ခြင်းဖြစ်သည်။
“စီစဉ်သူတွေက နိုင်ငံတကာအစိုးရတွေကို ရည်ရွယ်ရေးသားထားတာဖြစ်ဟန်ရှိပါတယ်။ စီစဉ်သူတွေ ရေးသားခဲ့ကြတဲ့ slogan ဖြစ်ပေမယ့် အခမ်းအနားအချိန်ကိုနောက်ကျပြီးရောက်သွားတဲ့အတွက် သတိမထားလိုက်မိတာကို ဝန်ခံပါရစေ။ သတိမထားမိခဲ့တဲ့အတွက် ကျွန်တော်မှာလည်း တာဝန်ရှိပါတယ်။ ဒီစာသားကြောင့် အနှောက်အယှက်ဖြစ်စေခဲ့ရတဲ့အတွက် တောင်းပန်ရင်းနဲ့ နောင်ဒီလိုမဖြစ်အောင် သတိပြုဆင်ခြင်ပါမယ်ဆိုတဲ့အကြောင်းကို ကတိပြုလိုပါတယ်” ဟု ဝန်ကြီး ဦးအောင်မျိုးမင်းက ၎င်း၏လူမှုကွန်ရက်မှတဆင့် လူထုကို အသိပေးသည်။
ထို့အပြင် လက်ရှိတော်လှန်ရေးသည် အမျိုးသားညီညွတ်ရေးအစိုးရ NUG တစ်ခုတည်း၏ တော် လှန်ရေးမဟုတ်ဘဲ ပြည်သူလူထုတရပ်လုံး၏ တော်လှန်ရေးဖြစ်ကြောင်းနှင့် NUG သည် တော် လှန်ရေးအတွက် ယာဉ်ရထားတစ်စင်း၊ နည်းလမ်းတစ်ခုနှင့် အစိတ်အပိုင်း တစ်ရပ်သာဖြစ် ကြောင်း ဝန်ကြီး ဦးအောင်မျိုးမင်းက ဆိုသည်။
Public Service Announcement
အထက်ပါ နယူးယောက်မြန်မာမိသားစုနှင့်တွေ့ဆုံပွဲသို့ တက်ရောက်သူ ၁၀၀ ခန့်ရှိခဲ့ပြီး နယူးယောက်မှ တော်လှန်ရေးမိသားစုများ ရင်းနှီးပွင့်လင်းစွာ တွေ့ဆုံဆွေးနွေးကာ အပြန်အလှန်ခွန်အားယူကြသည့်ပွဲလေးဖြစ်ကြောင်း ဝန်ကြီးက ရေးသားထားသည်။
‘Denying NUG is Denying Democracy’(NUG ကို ငြင်းပယ်ခြင်းက ဒီမိုကရေစီကို ငြင်းပယ်ခြင်းဖြစ်သည်)ဟုသော စာသားရေးသားထားခြင်းနှင့်ပတ်သပ်၍ နွေဦးတော်လှန်ရေးတွင်ပါဝင်နေသော တက်ကြွလှုပ်ရှားသူအချို့ကလည်းဝေဖန်ထောက်ပြခဲသည်။
“ကျမတို့ခေါင်းထဲသံမှိုစွဲအောင် မှတ်ထားရမှာက – NUG ကြောင့် နွေဦးဖက်ဆစ်တော်လှန်ရေးဖြစ်ပေါ်လာခြင်းမဟုတ်။ NUG ကြောင့် ဒီမိုကရေစီအတွက် အသက်ပေး တိုက်ပွဲဝင်နေကြခြင်းမဟုတ်။ ဖက်ဆစ်အာဏာရှင်စနစ်ကို ရွံ့မုန်းခြင်းကြောင့်၊ ဒီမိုကရေစီရေးအတွက်တိုက်ပွဲဝင်နေကြခြင်းဖြစ်တယ်” ဟု ဘူသိ့များသော နိုင်ငံရေးတက်ကြွလှုပ်ရှားသူတစ်ဦဖြစ်သော မအက်စတာဇာနောက ၎င်း၏ဖေစ်ဘွခ်တွင်ရေးသားထောက်ပြထားသည်။
နွေဦးတော်လှန်ရေး ကနဦး ရန်ကုန်တွင် စစ်အာဏာရှင်ဆန်ကျင်ရေး အစောဆုံးဆန္ဒပြပွဲများတွင်ပါဝင်ခဲ့သူတစ်ဦးဖြစ်ပြီး ၊Time Magazine ၏၂၀၂၁ ခုနှစ် သြဇာအလွှမ်းမိုးနိုင်ဆုံးပုဂ္ဂိုလ် ၁၀၀ တွင် ရွေးချယ်ခံခဲ့သော အက်စတာေဇေနောက ဆက်လက်၍လည်း”NUG ဟာ လက်ရှိကြားကာလရဲ့ ယာယီပြည်သူ့ကိုယ်စားလှယ်တွေဖြစ်တယ်။ ပြည်သူကို ကိုယ်စားမပြုနိုင်တဲ့ တစ်နေ့ အဆုံးသတ်ရလိမ့်မယ်။ NUG အဆုံးသတ်သွားခဲ့ရင်တောင် ပြည်သူရဲ့ ဒီမိုကရေစီ ဆာငတ်ခြင်းကတော့ ပျယ်ပျောက်သွားမှာမဟုတ်ပါဘူး။ အခုလိုပြောတာ NUG ကို တိုက်ခိုက်ခြင်းမဟုတ်ပါ။ နောက်ထပ် ခေတ်သစ်ဖက်ဆစ်မျိုးစေ့ကို တော်လှန်ရေးခေါင်းစဉ်အောက်က အစုအဖွဲ့တွေအတွင်းမှာ လုံးဝ(လုံးဝ) မမြင်တွေ့လိုတော့တဲ့အတွက် ဖြစ်ပါတယ်။ အရေးတော်ပုံအောင်ရမယ်! “ဟုထောက်ပြထားသည်။
