မကွေးတိုင်း ပေါက်မြို့နယ် အတွင်းစစ်ကြောင်းထိုးလာသည့် စစ်ကောင်စီတပ်ကို ဒေသတွင်းပြည်သူ့ကာကွယ် ရေးတပ်(PDF)ပူးပေါင်းအဖွဲ့က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိခဲ့ကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန၏ နေ့စဉ် စစ်ရေးသတင်း၌ ဖော်ပြထားသည်။
ဧပြီ ၂၃ရက်က မကွေးတိုင်း ပေါက်မြို့နယ် ဇီးပြားရွာဘက်တွင် စစ်ကြောင်းထိုးလာသည့် စစ်ကောင်စီတပ်သား ၇၀ကျော်ကို ညောင်ရင်းရွာအနီးတွင် တိုက်ခိုက်ခဲ့ခြင်းဖြစ်သည်ဟု ဆိုသည်။
ထိုသို့ တိုက်ခိုက်မှုကြောင့် စစ်ကောင်စီတပ်သား ငါးဦးသေဆုံးပြီး PDF ရဲဘော်များ အထိအခိုက်မရှိ ပြန်လည်ဆုတ်ခွာလာနိုင်ခဲ့သည်ဟု ဖော်ပြထားသည်။
အဆိုပါ တိုက်ခိုက်မှုကို မြိုင် ပြည်သူ့ကာကွယ်ရေးတပ်ဖွဲ့ ၊ ပခုက္ကူ တော်လှန်ရေးတပ်ဦး(PRF)၊ ပခုက္ကူ GZ၊ ပေါက် ပြည်သူ့ကာကွယ်ရေးတပ်ဖွဲ့၊ ပေါက်တောင်ပိုင်း တိမ်လွှာအဖွဲ့ နှင့် အခြားမဟာမိတ်တပ်ပေါင်းစုများ ပူးပေါင်းတိုက်ခိုက်ခဲ့ခြင်းဖြစ်ကြောင်းထုတ်ပြန်ထား သည်။
စစ်ကောင်စီတပ်သည် ပေါက်မြို့နယ်ရှိ ကျေးရွာများအား ဧပြီ ၇ရက်မှစ၍ ဝင်ရောက်စီးနင်း တိုက်ခိုက်ခြင်း၊ မီးရှို့ဖျက်ဆီးခြင်းများလုပ်ဆောင်ခဲ့၍ ကျေးရွာ ၂၀ခန့်မှ ဒေသခံပြည်သူများထွက်ပြေးတိမ်းရှောင်နေကြရသည်။