●စစ်လက်နက်ဖိုးငွေပေးချေရန် ၊စစ်ဗိုလ်ချုပ်များ၏ ပိုင်ဆိုင်မှုရုရှားသို့ရွှေ့ရန်ဖြစ်နိုင်ကြောင်းလုပ်ငန်းရှင်အချို့သုံးသပ်
စစ်တပ်ပိုင် မြဝတီဘဏ်နှင့် အင်းဝဘဏ်တို့က ရုရှားဘဏ် ၅ခုတွင် ဘဏ်စာရင်းဖွင့်လှစ်မည်ဖြစ်ကြောင်း စစ်ကောင်စီဗဟိုဘဏ်က ပြည်တွင်းဘဏ်လုပ်ငန်းရှင်များထံ ဧပြီ ၂၅ ရက်က အကြောင်းကြားသည့်စာတွင် ဖော်ပြထားသည်။
ထိုအကြောင်းကြားစာတွင် ရုရှားနှင့် မြန်မာနိုင်ငံရှိဘဏ်များကြား ဆွေးနွေးလိုသည်ဟု ဧပြီ ၂၀ ရက်တွင်အကြောင်းကြားလာခြင်းဖြစ်သည်ဟု စစ်ကောင်စီ၏ဗဟိုဘဏ်ကဆိုထားသည်။
စစ်ကောင်စီ၏ဗဟိုဘဏ်က စစ်တပ်ပိုင် မြဝတီဘဏ်နှင့်အင်းဝဘဏ်များသည် ရုရှားဘဏ် ၅ခုတွင် စာရင်းဖွင့်ရန် အမည်နှင့်ဆက်သွယ်ရမည့်သူများကို ရုရှားဗဟိုဘဏ်သို့ ပေးပို့ထားပြီးဖြစ်သည်ဟုလည်းလည်းစာတွင်ဖော်ပြထားသည်။
“စစ်တပ်နဲ့ ပတ်သတ်တဲ့ ဘဏ်တွေကသွားဖွင့်တာဆိုတော့ စစ်ဘက်ဆိုင်ရာနဲ့ လက်နက်တွေအတွက် ငွေချေဖို့လည်းဖြစ်နိုင်သလို၊ သူတို့ရဲ့ ပိုင်ဆိုင်မူတွေကို ရုရှားကို ရွှေ့ဖို့ ကြိုတင်ပြင်ဆင်တာလဲပါမယ်”ဟု ဘဏ္ဍာရေးဆိုင်ရာ စီးပွားရေးလုပ်ငန်းရှင်တစ်ဦးကပြောသည်။
မြဝတီဘဏ်နှင့် အင်းဝဘဏ်တို့က အာဏာသိမ်းစစ်တပ်အတွက် အဓိကငွေကြေးစီးဆင်းရာဘဏ္ဍာရေးလမ်းကြောင်းများဖြစ်ပြီး အမေရိကန်က ပိတ်ဆို့အရေးယူထားသည့် ဘဏ်များဖြစ်သည်။
“ရုရှားဘဏ်တွေဆီ ပိုင်ဆိုင်မှုတွေရွှေ့မလို့ စလှမ်းတဲ့ ခြေလှမ်းလို့ မြင်တယ်”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးကသူ၏ အမြင်ကိုပြောသည်။
မြဝတီဘဏ်နှင့် အင်းဝဘဏ်တို့သည် ရှရုားနိုင်ငံဘဏ်ငါးခုတွင်ငွေစာရင်းဖွင့်လှစ်ရန် အကြောင်းကြားသဖြင့် နှစ်နိုင်ငံဘဏ်များကြား မေလတွင် ဗီဒီယိုကွန်းဖရင့်ပြုလုပ်ရန် ရုရှားဗဟိုဘဏ်က အကြောင်းကြားလာကြောင်း စစ်ကောင်စီ၏ ဗဟိုဘဏ်က မြန်မာနိုင်ငံဘဏ်များအသင်းသို့ အကြောင်းကြားစာပေးပို့ထားသည်။
ယူကရိန်းကို ရုရှားနိုင်ငံက ကျူးကျော်မူကြောင့် ရုရှားဘဏ်များသည်လည်း မြန်မာနိုင်ငံကဘဏ်များကဲ့သို့ ငွေသားထုတ်ယူခွင့်ကန့်သတ်ထားသည်။