အိုးဘိုထောင် ရုံးချိန်းကနေအပြန် ဖမ်းဆီးခံလိုက်ရတဲ့ တရားလွှတ်တော်ရှေ့နေ ဒေါ်ရွက်နုအောင်ကို စစ်ကောင်စီက အကြမ်းဖက်ပုဒ်မ ၅၀ (ည) နဲ့ အမှုဖွင့်ဖမ်းဆီးထားပါတယ်။
ရှေ့နေ ဒေါ်ရွက်နုအောင်ဟာ မန္တလေးတိုင်းဝန်ကြီးချုပ် ဒေါက်တာဇော်မြင့်မောင် စွပ်စွဲခံထားရတဲ့အမှုတွေကိုလိုက်ပါဆောင်ရွက်ပေးနေတဲ့ရှေ့နေဖြစ်ပါတယ်။
မနေ့က အိုးဘိုထောင်တွင်းအထူးတရားရုံးမှာ စစ်ဆေးတဲ့ ဒေါက်တာဇော်မြင့်မောင်ရဲ့ရုံးချိန်းအပြီး ပြန်အလာ လမ်းမှာတင် ဖမ်းဆီးခံရတာပါ။
ဒေါ်ရွက်နုအောင်ဟာ စစ်အာဏာသိမ်းပြီးနောက်ဖမ်းဆီးတရားစွဲခံထားရတဲ့ မန္တလေးတိုင်းအစိုးရအဖွဲ့ဝင်တွေ အတွက် ရှေ့နေ လိုက်ပါဆောင်ရွက်ပေးနေသူ အမျိုးသမီးတစ်ဦးလည်းဖြစ်ပါတယ်။
ဒါအပြင် မန္တလေးတိုင်း NLD ဥပဒေအကြံပေးလည်းဖြစ်ပါတယ်။
အခုစွဲဆိုထားတဲ့ အကြမ်းဖက်ပုဒ်မ ၅၀ (ည) ဟာ နွေဦးတော်လှန်ရေးမှာ တော်လှန်ရေးအင်အားစုတွေကို ငွေကြေးထောက်ပံ့တယ်ဆိုပြီး စွပ်စွဲဖမ်းဆီးထားသူတွေကို စစ်ကောင်စီက အများဆုံး စွဲဆိုတဲ့ပုဒ်မလည်းဖြစ်ပါတယ်။
ဒီပုဒ်မဟာ အနိမ့်ဆုံး ထောင်ဒဏ် ၁၀ နှစ်ကနေ အမြင့်ဆုံး ထောင်တစ်သက်အထိချလို့ရတဲ့ပုဒ်မလည်းဖြစ်ပါတယ်။
