အကြမ်းဖက်စစ်ကောင်စီသည် ပြည်သူ့ကာကွယ်ရေးတပ်(PDF)အား တန်ပြန်တိုက်ခိုက်ရန် ပြည်သူအချိို့အား စည်းရုံးပြီး လက်နက်တပ်ဆင်ပေးနေ၍ အဆိုပါလက်နက်အား ရန်သူ့လက်နက် ၊ကိုယ့်လက်နက်ဖြစ်စေရေးလုပ်ဆောင်ကြရန် ဗိုလ်နဂါးက တိုက်တွန်းလိုက်သည်။
” တို့ပြည်သူတွေ လက်နက်အလွယ်တကူရယူနိုင်မယ့် အခွင့်ရေးကောင်းကို လက်မလွတ်ကြဖို့ စကစ လက်နက်တပ်ဆင်မယ့် ပြည်သူ့လုံခြုံရေးဆိုတဲ့ အဖွဲ့တွေမှာပါဝင်ကြပါ။ဒါဟာအခွင့်အရေးကောင်းတစ်ခုဖြစ်တယ်” ဟု မြန်မာ့တော်ဝင်နဂါးတပ်တော်ခေါင်းဆောင် ဗိုလ်နဂါးက လူမှုကွန်ရက်မှတစ်ဆင့် ယနေ့(ဧပြီ ၂၉ရက်) တိုက်တွန်းခြင်းဖြစ်သည်။
စစ်ကောင်စီသည် နည်းလမ်းပေါင်းစုံဖြင့်ယုတ်မာနေပြီး ပြည်သူ့လုံခြုံရေးတပ်အဖြစ် ဖွဲ့စည်းထားကြောင်း၊ပြည်သူများအနေဖြင့် စစ်ကောင်စီ၏ ပြည်သူ့လုံခြုံရေးတပ်တွင် ပါးပါးနပ်နပ်ပါ၀င်ပြီး လက်နက်များယူရန်နှင့် သတင်းပေးရန် မြန်မာ့တော်၀င်နဂါးတပ်တော်(ရန်ကုန်)ကလည်း ထုတ်ပြန် တိုက်တွန်းထားသည်။
မြန်မာနိုင်ငံဒေသအနှံ့တွင် ပြည်သူ့ကာကွယ်ရေးတပ်ဖွဲ့များ အင်အားကောင်းလာပြီး စစ်ကောင်စီအား အရှိန်မြှင့်တိုက်ခိုက်နေသည်။ တိုက်ပွဲတိုင်းတွင် အထိနာပြီး အကျပ်ရိုက်နေသည့် စစ်ကောင်စီက တိုင်းရင်းသားလက်နက်ကိုင်အဖွဲ့များအား ငြိမ်းချမ်းရေးဆွေးနွေးရန် ကမ်းလှမ်းထားသလို တစ်ဖက်တွင် ပြည်သူ့ကာကွယ် ရေးတပ်ဖွဲ့များအား အကြမ်းဖက်အဖွဲ့အဖြစ် ဝါဒဖြန့်ကာ ပြည်သူချင်း ပြန်တိုက်ခိုက်စေရန် နည်းပေါင်းစုံကြိုးစားနေသည်။
Public Service Announcement
ရန်ကုန်မြို့ရှိ မြို့နယ်အချို့တွင် လုံခြုံရေးအကြောင်းပြကာ ပြည်သူ့လုံခြုံရေးတပ်ဖွဲ့စည်းရန် စစ်ကောင်စီက လူစုနေသည်ဟု သတင်းများထွက်ပေါ်နေသည်။.
တောင်ဒဂုံ၊မြောက်ဒဂုံ၊မြောက်ဥက္ကလာပ၊ လှိုင်သာယာနှင့်ရွှေပြည်သာမြို့နယ်အပါအဝင် အဆိုပါမြို့နယ်များမှ ဆင်ခြေဖုံးရပ်ကွက်များရှိ ခိုး၊ဆိုး၊လုနှိုက်များကို တစ်ရက်လျှင် နေ့စား ရှစ်ထောင်ကျပ်ပေးကာ လူစုနေခြင်းဖြစ်ကြောင်း စစ်အာဏာရှင်ဆန့်ကျင်ရေးလှုပ်ရှားနေသူတစ်ဦးက People’s Spring သို့ပြောသည်။
