▪️စစ်ကောင်စီတပ်က မြာကျေးရွာအား ပစ်ခတ်၍ ဒေသခံများ ဘေးလွတ်ရာရှောင်နေရ
ပဲခူးတိုင်း၊ တောင်ငူမြို့နယ် စမိုးလမ်းအနီး စစ်ကောင်စီစစ်ကြောင်းကို တိုက်ခိုက်ရာ အနည်းဆုံးရှစ်ဦးသေဆုံးကြောင်း Bago Region PDF က ထုတ်ပြန်သည်။
ယနေ့ (ဧပြီ ၃၀ ရက်) ညနေ ၆နာရီခန့်က တောင်ငူခရိုင် တပ်ရင်းအမှတ် (၃၅၀၁)၊ တပ်ခွဲ (၃) ဗိုလ်ကြက်သွန် တပ်ဖွဲ့မှ အင်အား ၃၀နီးပါးရှိသော စစ်ကောင်စီ စစ်ကြောင်းတစ်ခုကို ရှေ့ထွက်ပြောင်းဖြင့် ဦးစွာပစ်ပြီးထပ်မံမိုင်းဆွဲတိုက်ခိုက်ရာ စစ်ကောင်စီတပ်ဖွဲ့ဝင် အနည်းဆုံးရှစ်ဦးသေဆုံးပြီး အများအပြား ဒဏ်ရာရရှိခဲ့သည်ဟု ဆိုသည်။
အလားတူ ယမန်နေ့(ဧပြီ ၂၉ ရက်) နံနက် ၉ နာရီခန့်ကလည်း တောင်ငူမြို့နယ်ရှိ ဝက်ခေါက်စိန်ကျေးရွာအုပ်စု မြာရွာအနီးရှိ PDF တပ်ဖွဲ့ဝင်များအား အကြမ်းဖက်စစ်ကောင်စီမှ သာလွန်အင်အားဖြင့် စစ်ကြောင်းထိုးတိုက်ခိုက်ခဲ့သည်။
Public Service Announcement
သို့သော် ပြည်သူ့ကာကွယ်ရေးတပ်ဖွဲ့ဝင်များအနေဖြင့် လူ အင်အား၊ လက်နက်အင်အား မမျှတသောကြောင့် ဆုတ်ခွာပေးခဲ့ရသည်ဟု ဆိုသည်။
အလားတူ စစ်ကောင်စီတပ်မှ မြာရွာအတွင်း လက်နက် ကြီးများဖြင့် ပစ်ခတ်၀င်ရောက်လာတာကြောင့် ဒေသခံပြည်သူ ၂၀၀ကျော် စစ်ဘေးရှောင်နေရသည်ဟု သိရသည်။
“ ရွာထဲကို လက်နက်ကြီးနဲ့ချည်း ပစ်တာ၁၀ချက်ကျော်တယ်။ပြီးတော့ သေနတ်သံတွေကို အတွဲလိုက်ပစ်တာဆိုတာလည်း မရေနိုင်ဘူး။ ကျွန်တော်တို့ အရေးပေါ်ထ ပြေးရတော့ ဘာအစားအစာမှ မယ်မယ်ရရမရှိဘူး။ဆေးဝါး ဆိုတာ တော့ ပြောမနေနဲ့ “ ဟု စစ်ဘေးရှောင် မြာရွာ ဒေသခံတစ်ဦးက ပြောသည်။
စစ်ဘေးရှောင်ပြည်သူများသည် တိုက်ပွဲဖြစ်ပွားရာဘေးလွတ်ရာသို့ရှောင်နေကြစဉ် အခြေခံလိုအပ်ချက်များနှင့် စားနပ်ရိက္ခာ၊ ဆေးဝါးများများ လိုအပ်လျက်ရှိနေပြီး တောင်ငူခရိုင် တပ်ရင်းအမှတ်(၃၅၀၁)မှ စစ်ဘေးရှောင်ပြည်သူများ၏ လိုအပ်ချက်များကို တနိုင်တပိုင်ကူညီပေးနေပြီး လိုအပ်ချက်များစွာ ရှိနေကြောင်း အသိပေးသည်။
ပြည်သူလူထုအား နည်းမျိုးစုံဖြင့် နှိပ်စက်ဖိနှိပ်နေသော အကြမ်းဖက်စစ်ကောင်စီကို ပဲခူးတိုင်း PDF တပ်ရင်းများအနေဖြင့် တိုးမြှင့်တိုက်ခိုက်သွားမည် ဖြစ်ကြောင်းလည်း ထုတ်ပြန်ချက်၌ ဖော်ပြသည်။
