ကျားရွာ(တောင်ရွာ)ကို အကြမ်းဖက်စစ်အုပ်စုက သုံးရက်ဆက်မီးရှို့ဖျက်ဆီး၍ ဘုန်းကြီးကျောင်းအပါအဝင် ရွာလုံးကျွတ်မီးလောင်ဆုံးရှုံး

စစ်ကိုင်းတိုင်း၊ ရွှေဘိုမြို့နယ်ရှိ ကျားရွာ(တောင်ရွာ)ကို အကြမ်းဖက်စစ်ကောင်စီတပ်နှင့် ပျူစောထီးများက သုံးရက်ဆက်တိုက်မီးဝင်ရှို့ခဲ့ရာ ဘုန်းကြီးကျောင်းအပါအဝင် ရွာလုံးကျွတ် မီးလောင်ဆုံးရှုံးခဲ့ရကြောင်း ဒေသတွင်းသတင်းရင်းမြစ်များက ပြောသည်။

ရွှေဘိုမြို့နယ်၊ ခွန်တောင်းကြီးရွာမှ စစ်ကောင်စီတပ်နှင့် ပျူစောထီးအင်အား ၇၀ခန့်သည် ဧပြီ ၂၉ ရက်ကစတင်ကာ ယမန်နေ့ (မေလ ၁ ရက်)နံနက်ပိုင်းအထိ ကျားရွာ(တောင်ရွာ)အား သုံးရက်ဆက်တိုက် အကြမ်းဖက်ဝင်ရောက်မီးရှို့ဖျက်ဆီးခြင်းများ ပြုလုပ်ခဲ့ကြကြောင်း၊ အကြမ်းဖက်စစ်ကောင်စီတပ်များ ဝင်ရောက်မလာမီ ကျားရွာ(တောင်ရွာ)မှ ဒေသခံပြည်သူများသည် ကြိုတင်ထွက်ပြေးတိမ်းရှောင်ခဲ့ကြပြီး အကြမ်းဖက်စစ်တပ်နှင့် ပျူစောထီးများက ကျေးရွာအား မီးမရှို့မီ နေအိမ်များမှ တန်ဖိုးကြီးပစ္စည်းပေါင်းများစွာကို ပုဇင်းခေါင်းကား နှစ်စီးဖြင့် ခိုးယူသယ်ဆောင်ကာ တွေ့သမျှ ဆိုင်ကယ်များကိုပါ ယူဆောင်သွားကြကြောင်း၊ ကျားရွာတောင်ရွာသည် အိမ်ခြေ ၃၀၀ခန့် ရှိပြီး မေလ ၁ ရက်က ထပ်မံ မီးရှို့ခံရသည့်အတွက် ရွာလုံးကျွတ်နီးပါး မီးရှို့ ဖျက်ဆီးခံခဲ့ရကြောင်းဒေသခံများက ပြောသည်။

“စည်ကားလှတဲ့ရွာ​လေး​ပါ။​ ရွာထဲကအိမ်တွေဆို ကျွန်းတိုင်ကြီး​တွေနဲ့ပါ။ စိတ်မကောင်းဘူး။”ဟု ရွှေဘိုဒေသခံတစ်ဦးက ပြောသည်။

အကြမ်းဖက်စစ်တပ်၏ မီးရှို့ ဖျက်ဆီးခဲ့မှုကြောင့် ကျေးရွာနေအိမ်များအပြင် တောင်ရွာဘုန်းကြီးကျောင်းဝင်းအတွင်းမှ အဓိကကျောင်းဆောင်ကြီးတစ်ဆောင်လည်း မီးလောင်ပျက်စီးခဲ့ကြောင်း ဒေသခံများက ပြောသည်။

Public Service Announcement

ကျားရွာ(တောင်ရွာ)သည် ရွှေဘိုနယ် အနောက်မြောက်ခြမ်း၊ခင်ဦးနယ်အစပ်တွင် တည်ရှိသည်။ ကျားရွာသည် အလယ်ရွာ၊ အနောက်ရွာ၊ တောင်ရွာ၊ မြောက်ရွာဟူ၍ လေးရွာ ရှိပြီး စုစုပေါင်း အိမ်ခြေ ၁,၅၀၀ခန့် ရှိသည်။

အကြမ်းဖက်စစ်တပ်သည် စစ်ကိုင်းတိုင်းအတွင်းရှိ ကျေးရွာများအား အကြမ်းဖက်ဝင်ရောက် မီးရှို့ဖျက်ဆီးမှုများ ဆက်တိုက်ပြုလုပ်နေသည်။

အာဏာသိမ်းစစ်ကောင်စီတပ်က စစ်ကိုင်းနှင့် မကွေးတိုင်းရှိ ကျေးရွာများမှ ပြည်သူလူထုနေအိမ်များ အပါအဝင် နေရာပေါင်း ၄၀ကျော်၌ မီးရှို့ဖျက်ဆီးမှုများ အရှိန်မြှင့်လုပ်ဆောင်ခဲ့၍ နှစ်ပတ်အတွင်း အိမ်ခြေ ၂၂ ၃၀ လုံးထက်မနည်း မီးလောင်ပျက်စီးခဲ့ရကြောင်း Data for Myanmar က သတင်းထုတ်ပြန်ထားသည်။

၂၀၂၁ ဖေဖော်ဝါရီ ၁ရက်မှ ၂၀၂၂ ဧပြီ ၃၀ရက်အတွင်း စစ်ကောင်စီတပ်နှင့် လက်အောက်ခံ အဖွဲ့အစည်းများက နေရာပေါင်း ၂၉၆ နေရာမှ လူနေအိမ် ခန့်မှန်းခြေ ၁၁,၄၁၇ လုံးကို မီးရှို့ဖျက်ဆီးခဲ့သည်ဟု ဖော်ပြထားသည်။ Data for Myanmarက ဧပြီ ၁၃ရက်အထိ ထုတ်ပြန်ခဲ့သည့် စာရင်းမှာ နေရာပေါင်း ၂၅၄ နေရာမှ နေအိမ် ၉,၁၈၇လုံးကို စစ်ကောင်စီတပ်က မီးရှို့ခဲ့သည်ဟု ဖော်ပြခဲ့ရာ ယခုနှစ်ပတ်အတွင်း အိမ်ခြေ ၂ထောင်ကျော်ကို စစ်ကောင်စီတပ်က ထပ်မံမီးရှို့ခဲ့ခြင်းဖြစ်သည်။