စီးပွားရေးလုပ်ငန်းရှင် ဦးမောင်ဝိတ်ထံကနေ အမေရိကန် ဒေါ်လာ ငါးသိန်း လာဘ်ယူတယ်ဆိုကာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကို ထပ်တိုးတရားစွဲထားတဲ့ အဂတိအမှု ၂ မှုကို မနေ့က နေပြည်တော်အထူးတရားရုံးမှာစတင်စစ်ဆေးခဲ့ပါတယ်။
ဒီအမှုဟာ အာဏာသိမ်းပြီးနောက် ခေါ်ယူစစ်ဆေးခံရတဲ့ ဦးမောင်ဝိတ်ရဲ့ထွက်ဆိုချက်ကို အကြောင်းပြကာ စစ်ကောင်စီက ဒေါ်အောင်ဆန်းစုကြည်ကို တရားစွဲတဲ့အမှုဖြစ်ပါတယ်။
ဦးမောင်ဝိတ်ရဲ့ ထွက်ဆိုချက်ရုပ်သံဖိုင်ကို အာဏာသိမ်းပြီး တစ်လကျော်အကြာမှာ စစ်ကောင်စီက ဝါဒဖြန့်ထုတ်လွှင့်ခဲ့ဖူးပါတယ်။
အဲဒီရုပ်သံဖိုင်ထဲမှာ ဦးမောင်ဝိတ်က ဒေါ်အောင်ဆန်းစုကြည်ကို လုပ်ငန်းတွေအဆင်ပြေစေဖို့ အစိုးရအဖွဲ့ ထံ လှူဒါန်းတာတွေလုပ်ခဲ့သလို ဒေါ်ခင်ကြည်ဖောင်ဒေးရှင်းအတွက်လည်းအလှူငွေပေးအပ်ခဲ့တယ်လို့ဆိုထားပါတယ်။
Public Service Announcement
စုစုပေါင်း ဒေါ်လာငါးသိန်းကိုအကြိမ်ရေခွဲကာ ဒေါ်အောင်ဆန်းစုကြည် နေအိမ်မှာသွားပေးခဲ့တယ်လို့လည်း ထွက်ဆိုထားတာတွေ့ရပါတယ်။
စစ်ကောင်စီဟာ ဒေါ်အောင်ဆန်းစုကြည်ကို ဖမ်းဆီးပြီး အဂတိပုဒ်မတွေ အပါအဝင် ဒါဇင်နဲ့ချီတဲ့ အမှုတွေ နဲ့ တရားစွဲဆိုထားပါတယ်။ အမှုအချို့အတွက် ထောင်ဒဏ် ၁၁ နှစ်ချထားပြီးဖြစ်ပါတယ်။
မနေ့က တရားရုံးမှာ ဒေါ်ခင်ကြည်ဖောင်ဒေးရှင်း အတွက် မြေနေရာကိစ္စနဲ့ပတ်သက်ပြီး အဂတိအမှုနဲ့စွဲဆိုထားတဲ့အမှု ကိုစစ်ဆေးဖို့စီစဉ်ရာမှာ တရားလိုပြသက်သေဖြစ်တဲ့ ဒေါက်တာသန့်သော်ကောင်းမလာတဲ့အတွက် မစစ်ဆေးဖြစ်ဘူးလို့သိရပါတယ်။
ဒေါက်တာသန့်သော်ကောင်းဟာ ဒေါ်ခင်ကြည်ဖောင်ဒေးရှင်းရဲ့ အလုပ်အမှုဆောင်အဖွဲ့ဝင်လည်းဖြစ်ပါတယ်။
