မြန်မာစစ်တပ်နှင့် စီးပွားရေးဆက်ဆံနေသည့် ဂျပန်ကုမ္ပဏီနှစ်ခု၏ ရင်းနှီးမြှုပ်နှံသူ ၁၀၁ ဦးထံ အရပ်ဘက်အဖွဲ့အစည်း ၈ ဖွဲ့က အလေးအနက်စိုးရိမ်ကြောင်းစာ ပေးပို့ကြောင်း Justice For Myanmar က ထုတ်ပြန်သည်။
ရန်ကုန်မြို့ရှိ Y Complex စီမံကိန်းနှင့်ပတ်သက်၍ Tokyo Tatemono ၊ Daiwa House Industry ကုမ္ပဏီတို့၏ စီမံကိန်းအသုံးပြုမြေ ငှားရမ်းခများသည် မြန်မာစစ်တပ်၏ လူ့အခွင့်အရေးချိုးဖောက်မှုများအတွက် ဘဏ္ဍာငွေအထောက်အပံ့ဖြစ်စေနိုင်သည့်ကိစ္စအပေါ် ထိုကုမ္ပဏီ ၂ ခုတို့နှင့် တွေ့ဆုံဆွေးနွေးရန် ရင်းနှီးမြှုပ်နှံသူ ၁၀၁ ဦးထံ စာရေးသား ပေးပို့ခြင်းဖြစ်သည်ဟု ဆိုသည်။
တစ်နှစ်လျှင် မြေငှားရမ်းခ အမေရိကန် ဒေါ်လာ ၂ သန်းခန့် ရှိသည့် Y Complex ရန်ကုန်အိမ်ခြံမြေဖွံ့ဖြိုးတိုးတက်ရေးစီမံကိန်းအတွက် အထက်ပါဂျပန် ကုမ္ပဏီနှစ်ခု၏ မြေငှားရမ်းခငွေပေးချေမှုသည် မြန်မာစစ်တပ်အတွက် ရန်ပုံငွေ အရင်းအမြစ်တရပ် ဖြစ်နေကြောင်း JFM က မေ ၂၈ ရက်တွင် ထုတ်ပြန်သည်။
Tokyo Tatemono ကုမ္ပဏီ နှင့် Daiwa House Industry ကုမ္ပဏီတို့သည် မြန်မာစစ်တပ် ကျူးလွန်နေသည့် လူ့အခွင့်အရေးချိုးဖောက်မှုများတွင် အလိုတူအလိုပါ အားပေးသူများ ဖြစ်နေသည်ဟု အကြိမ်ကြိမ်ထောက်ပြခဲ့ပြီး ကုမ္ပဏီများအနေဖြင့် ၎င်းတို့၏ လူ့အခွင့်အရေးမူဝါဒ၊ နိုင်ငံတကာစံနှုန်းများနှင့်အညီ လုပ်ဆောင်ရန် တိုက်တွန်းထားသည်။
သို့သော် အဆိုပါကုမ္ပဏီနှစ်ခုလုံးသည် အကြမ်းဖက်မြန်မာစစ်တပ်၏ ရက်စက်ကြမ်းကြုတ် သော လူ့အခွင့်အရေးချိုးဖောက်မှုများနှင့် နိုင်ငံတကာရာဇ၀တ်မှုများတွင် ပါဝင်ပတ်သက်အားပေးနေမှုများကို ရှောင်ရှားရန် တိကျရေရာသည့်အစီအစဉ်များကို တရားဝင်ထုတ်ပြန်ကြေညာခြင်း မရှိသေးပေ။
Public Service Announcement
အရပ်ဘက်အဖွဲ့အစည်း ၈ ခု၏ပေးစာတွင် Tokyo Tatemono နှင့် Daiwa House ကုမ္ပဏီများတွင် ရင်းနှီးမြုပ်နှံထားသူများသည် ၎င်းတို့၏ စီးပွါးရေးလုပ်ငန်းများက မြန်မာစစ်တပ်ကိုအကျိုးဖြစ်ထွန်းမှု မရှိစေရေး အစီအမံများ သေချာစွာချမှတ်ဆောင်ရွက်ရေး အမြန်ဆုံးတွန်းအားပေးရန် တောင်းဆို ထားသည်။
ထို့အပြင် ယင်းကုမ္ပဏီနှစ်ခုက လုံလောက်သည့် အရေးယူဆောင်ရွက်ချက်များ လုပ်ဆောင်ခြင်း မရှိပါက ထိုကုမ္ပဏီများတွင် ရင်းနှီးမြုပ်နှံထားခြင်းမှ နုတ်ထွက်ရန် စဉ်းစားသင့်ကြောင်း ရင်းနှီးမြှုပ်နှံသူများအား ထပ်လောင်း တောင်းဆိုကြောင်း ပေးစာ၌ ဖော်ပြသည်။
