ဖာပွန်မြို့အခြေစိုက် စစ်ကောင်စီရဲ့တပ်စခန်းတွေကို ပြီးခဲ့တဲ့ရက်ပိုင်းက ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ က သုံးကြိမ်တိုင်တိုင်ဝင်ရောက်တိုက်ခိုက်ခဲ့တယ်လို့ မူတြော်သတင်းစဉ်က ထုတ်ပြန်ထားပါတယ်။
မေလ ၂၈ ရက် က KNLA တပ်မဟာ ၅ တပ်ဖွဲ့ဝင်တွေဟာ ဖာပွန်အခြေစိုက်တပ်စခန်းတွေကို သုံးကြိမ်ဝင်ရောက်တိုက်ခိုက်ခဲ့ပြီး အဲဒီလိုဝင်ရောက်တိုက်ခိုက်ရာမှာ စစ်ကောင်စီဘက်က သေကြေထိခိုက်မှုစာရင်း အတိအကျမရရှိသေးပဲ KNLA ဘက်ကတော့ ထိခိုက်ကျဆုံးမှုမရှိဘူးလို့ ထုတ်ပြန်ချက်မှာ ဖော်ပြထားပါတယ်။
မေ ၂၈ ရက် မနက် ၇ နာရီခွဲအချိန်က ဖာပွန်ဗျူဟာကုန်းကနေ စစ်ကောင်စီတပ်တွေဟာ မူတြော်(ဖာပွန်)ခရိုင် ဒွယ်လိုးမြို့နယ်ရှိ ပွယ်ပါကကျေးရွာထဲကို အမြောက်လက်နက်ကြီးပစ်ချခဲ့ရာ အသက်(၁၀)နှစ်အရွယ် ကလေးတစ်ဦး ခြေထောက်မှာ ဒဏ်ရာပြင်းထန်စွာရရှိသွားခဲ့တယ်လို့ ထုတ်ပြန်ချက်မှာပါရှိပါတယ်။
ဒါအပြင် မနေ့ မေ ၂၉ ရက် မနက် ၆ နာရီကစတင်ပြီး စစ်ကောင်စီရဲ့ ဂျက်တိုက်လေယာဉ်တစ်စီးဟာ ကေအဲန်ယူ-မူတြော်ခရိုင်ထိန်းချုပ်ရာဒေသတွေအပေါ် အကြိမ်ကြိမ်လာရောက်ကင်းထောက်ခဲ့သေးတယ်လို့ တပ်မဟာ ၅ ကဆိုပါတယ်။
ဒီလို စစ်ကောင်စီလေတပ်က လာရောက်ကင်းထောက်စုံစမ်းပြီး အချက်အလက်ရယူတာဟာ ဗုံးလာရောက်ကြဲချနိုင်ခြေရှိတာကြောင့် ဒေသခံပြည်သူတွေအနေနဲ့ သတိထားပြီး သွားလာနေထိုင်ကြဖို့ ဒေသခံတွေက အသိပေးပြောဆိုထားပါတယ်။