မြစ်ကြီးနား – ပူတာအိုလမ်း၌ စစ်ကောင်စီယာဉ်တန်းကို KIA/PDF ပူးပေါင်းတပ် ကြားဖြတ်တိုက်ခိုက်

ကချင်ပြည်နယ် မြစ်ကြီးနား – ပူတာအို လမ်းပိုင်းတွင် စစ်ကောင်စီယာဉ်တန်းကို ကချင်လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်(PDF) ပူးပေါင်းအဖွဲ့က တိုက်ခိုက်ခဲ့၍ တိုက်ပွဲပြင်းထန်ခဲ့ကြောင်း ပူတာအိုဒေသခံ တစ်ဦးက ပြောသည်။

ပူတာအိုဘက်မှ မြစ်ကြီးနားဘက်သို့ ပြန်လာသည့် စစ်ကောင်စီတပ်ယာဉ်တန်းကို ယနေ့(ဇွန်လ ၈ရက်)နေ့လည် ၁၂နာရီဝန်းကျင်၌ KIA/PDF ပူးပေါင်းတပ်က တိုက်ခိုက်ခဲ့သည်ဟုဆိုသည်။

“ဆွမ်ပရာဘွမ်နဲ့ ခါကရမ်းကြားမှာဟုတ်တယ် တိုက်ပွဲဖြစ်တာ။ အသေအပျောက်ရယ်တော့ မသိသေးဘူး ဖြစ်တာတော့ နည်းနည်းကြာအောင်ဖြစ်တာ။ KIAနဲ့ PDF တွေ ပူးပေါင်း တပ်ဖွဲ့တွေက ရိက္ခာပို့ပြီး မြစ်ကြီးနားကို ပြန်ဆင်းလာတဲ့ ယာဉ်တန်းအဖွဲ့တွေကို လမ်းခုလက်မှာ ဝင်တိုက်တာ။ အဲဒီကနေ တိုက်ပွဲက ပြင်းထန်ပြီး အဲဒီလိုမျိုးတွေဖြစ်ကြတာ”ဟု ဒေသခံက ပြောသည်။

ထိုသို့ တိုက်ပွဲဖြစ်၍ ဆွမ်ပရာဘွမ်ရှိ စစ်ကောင်စီ၏ ရဲဂိတ်က ကားများကို အသွားအလာပိတ်ပင်ထားခဲ့ကြောင်း၎င်းက ဆိုသည်။

Public Service Announcement

မြစ်ကြီးနား – ပူတာအိုလမ်းတွင် စစ်ကောင်စီတပ် ယာဉ်တန်းများ၊ စစ်ကြောင်းများ ဖြတ်သန်းသွားလာတိုင်း KIA/PDF ပူးပေါင်းတပ်များက တိုက်ခိုက်မှုများ လုပ်ဆောင်လေ့ရှိသည်။

ဓာတ်ပုံ – မြစ်ကြီးနားသတင်းဂျာနယ်