အမျိုးသားညီညွတ်ရေးအစိုးရ(NUG)က ကရင်အမျိုးသားကာကွယ်ရေးတပ်(KNDO)ထံသို့ ဘတ်တစ်သန်း ထောက်ပံ့ပေးကြောင်း KNDOတပ်မှူးတစ်ဦးက အတည်ပြုသည်။
KNDO၏ တပ်ရင်းတစ်ခုသည် မြ၀တီမြို့နယ် ဝေါ်လေဒေသရှိ အာဏာသိမ်းစစ်ကောင်စီ၏ ဥကရစ်ထ တပ်စခန်း တိုက်ခိုက်သိမ်းပိုက်ရာတွင် ပါဝင်နေပြီး တိုက်ပွဲပြင်းထန်နေချိန်တွင် NUGက ယခုကဲ့သို ထောက်ပံ့ငွေ ပေးအပ်လိုက်ခြင်းဖြစ်သည်။
KNDO ဗဟိုစစ်ဦးစီးချုပ် ဗိုလ်ချုပ်နယ်ဒါးမြထံသို့ NUG အစိုးရမှ ပေးအပ်သော စစ်သုံးစရိတ် ထောက်ပံ့ငွေ ဘတ်တစ်သန်းကို ယနေ့ (ဇွန်လ ၂၈ရက်)တွင် လက်ခံရရှိကြောင်း KNDO ထောက်ပို့ တပ်ခွဲဗိုလ်ကေက အသိပေးသည်။
ပြည်သူ့အစိုးရမှ တစ်ဆင့် ပြည်သူ့ရဲဘော်များအတွက် ပေးပို့လာသော ထောက်ပံ့ငွေ အားလုံးကို ဗိုလ်ချုပ်နယ်ဒါးမြထံ လွှဲအပ်ပြီး ဖြစ်ကြောင်း၊ ပြည်သူ့အစိုးရနှင့် ပြည်သူများ ကူညီသော ငွေများကို KNDO အဖွဲ့အစည်း အနေဖြင့် အလေအလွင့်မရှိအောင် ထိရောက်စွာ အသုံး ပြုသွားမည်ဖြစ်ကြောင်း ဗိုလ်ကေ ၎င်း၏ Facebook တွင် ရေးသားဖော်ပြသည်။
Public Service Announcement
အဆိုပါ လှူဒါန်းမှုနှင့်ပတ်သက်ပြီး KNDOအထူးကွန်မန်ဒိုတပ် ဆင်ဖြူတပ်ရင်းမှ တပ်မှူးတစ်ဦးဖြစ်သည့် ဗိုလ်စလုံးအား ဆက်သွယ်မေးမြန်းရာ ဗိုလ်ချုပ်နယ်ဒါးမြထံ မေးမြန်းပေးမည်ဟု ပြောကြားကာ မေးမြန်းပေး သည်။
“ကျွန်တော်မေးလိုက်တယ် ဗိုလ်ချုပ်နယ်ဒါးမြကို။ သူ့ဆီကို ရောက်ပြီ သူ့ဆီကို အပ်ပြီတဲ့ဘတ်ငွေတစ်သန်း” ဟု ဗိုလ်စလုံးအား ထပ်မံဆက်သွယ်ရာတွင် ဖြေကြားသည်။
“ အခုက စခန်းကို ရအောင်သိမ်းမယ်။ ဗိုလ်ချုပ်နယ်ဒါးမြလည်း ကျည်ဆံတွေဘာတွေ ထပ်ပို့ပေး တာပဲ။ သူကတော့ ရတဲ့ ပိုက်ဆံတွေက လက်နက်၊ ကျည်ဆံတွေ၊ ရိက္ခာတွေ သူကလည်း ကြိုးစားနေတာပဲ” ဟုလည်း ဗိုလ်စလုံးက ပြောသည်။
အကယ်၍ ၎င်းတို့၏ ဆင်ဖြူတပ်ရင်း သို့ လှူဒါန်းလိုပါကလည်း တိုက်ရိုက်ဆက်သွယ်နိုင်ကြောင်း ဗိုလ်စလုံးက အသိပေးသည်။
“လက်ရှိ အခြေအနေက ကျွန်တော်တို့ အဲဒီစခန်းကို ရအောင်သိမ်းမယ်”ဟု ဗိုလ်စလုံးက ဥကရစ်ထ တပ်စခန်းသိမ်း တိုက်ပွဲအခြေအနေမေးမြန်းမှုအပေါ် မှတ်ချက်ပြုသည်။
အဆိုပါ တပ်စခန်းကို ဇွန်လ ၂၆ရက်ကတည်းက တိုက်ခိုက်လျက်ရှိရာ ၃ရက်ဆက် တိုက်ပွဲပြင်းထန်နေပြီး စစ်ကောင်စီတပ်အထိနာ၍ လေကြောင်း တိုက်ခိုက်မှုများ အကြိမ်ကြိမ် ပြုလုပ်တုံ့ပြန်ခဲ့သည်။ တိုက်ပွဲအတွင်း နှစ်ဖက် ထိခိုက်ကျဆုံးမှုများရှိပြီး စစ်ကောင်စီတပ်က သေဆုံးမှု ပိုများကြောင်း KNU သတင်းရင်းမြစ်က ပြောကြားသည်။
