ကနီရှိမီး​ဘေးသင့်ရွာကိုရပ်​ဝေး​ရောက်အလှူရှင်များကကျပ်သိန်း ၃၀၀ တန်ဖိုး ​ငွေနှင့်ပစ္စည်းများလှူဒါန်း

စစ်ကိုင်းတိုင်း၊ ကနီမြို့နယ်ရှိ အကြမ်းဖက်စစ်တပ်က မီးရှို့ဖျက်ဆီးသွားသော ကျေးရွာတစ်ရွာအား ရပ်ဝေးရောက်နေသည့် ၎င်းကျေးရွာသူကျေးရွာသားများနှင့် ပြင်ပအလှူရှင်များက ကျပ်သိန်း၃၀၀ တန်ဖိုး ​ငွေနှင့်အ​ရေး​ပေါ်ပစ္စည်းပေးအပ်လှူဒါန်းခဲ့ကြသည်။

ကနီမြို့နယ် ၊ရွာကြီးတစ်ရွာရှိမီးဘေးသင့်အိမ်ခြေ (၂၁၁ )အိမ်အတွက်မီးဘေးသင့်ရွာဇာတိ ဩစတျေးလျနိုင်ငံရောက်ရွာသူရွာသားများက တစ်အိမ်လျှင်ကျပ်ငွေ (၃၅၀၀၀)စီဖြင့် စုစုပေါင်း လှူဒါန်းငွေ သိန်း (၁၀၀)ကျပ်ကိုလည်းကောင်း၊ မီးဘေးသင့်ရွာ၏ အဝေးရောက် ရွာသူရွာသားများမှစုပေါင်း
အလှူခံရရှိငွေ ကျပ်သိန်း (၂၀၀)မှ တစ်အိမ်လျှင် (၅၀၀၀၀) ကျပ်စီ အသီးသီးပေးအပ်လှူဒါန်းနိုင်ခဲ့ကြောင်း ချင်းတွင်းနွေဦးတော်လှန်ရေးအင်အားစုက ဖော်ပြသည်။

အလှူငွေပေးအပ်နိုင်ရေးအတွက်စွမ်းစွမ်းတမံပါဝင်ကူညီပေးခဲ့ကြသော အလှူခံပေးကြသည့် လူငယ်များနှင့် အလှူရှင်တစ်ယောက်ချင်းစီတိုင်းအား မီးဘေးသင့်ပြည်သူလူထုကိုယ်စားများစွာကျေးဇူးတင်ဂုဏ်ယူရကြောင်းချင်းတွင်းနွေဦးတော်လှန်ရေးအင်အားစုက အသိပေးသည်။

အကြမ်းဖက်စစ်တပ် အာဏာသိမ်းပြီးချိန်မှစ၍ ၂၀၂၂ခုနှစ် မေလကုန်အထိ စစ်ကိုင်းတိုင်းအတွင်း ကျေးရွာများမှ လူနေအိမ်ပေါင်း ၁၃၈၄၀ ခန့်ကို အကြမ်းဖက်စစ်တပ်က မီးရှို့ဖျက်ဆီးထားကြောင်း Data For Myanmar အဖွဲ့က ထုတ်ပြန်ထားသည်။

Public Service Announcement