စစ်ကိုင်းတိုင်း ပုလဲမြို့ပေါ်ရှိ စစ်ကောင်စီတပ်အထိုင်ချတပ်စွဲထားသည့်နေရာများအား PDF ပူးပေါင်းတပ်များတိုက်ခိုက်ပြီး စစ်ကောင်စီတပ်မှ တစ်ဦးသေဆုံးကြောင်း ကျားသစ်နက်ပြောက်ကျားတပ်က ယနေ့(ဇူလိုင် ၅) ထုတ်ပြန်သည်။
ယမန်နေ့ည ၇ နာရီခန့်တွင် ပုလဲမြို့ပေါ်ရှိ စစ်ကောင်စီတပ်အထိုင်ချရာ နေရာအနှံ့အပြားကို ပုလဲတပ်ရင်း(၄ ) ကျားသစ်နက်ပြောက်ကျား တပ်ဖွဲ့ ၊ ပုလဲတပ်ရင်း (၅ ) ဒေါင်းနက် ပြောက်ကျားတပ်ဖွဲ့တို့နှင့်အတူ မဟာမိတ် တပ်ပေါင်းစုတွင်ပါဝင်သော မြိုင်မြို့နယ်မှ local PDF များ ၊ ပုလဲမြို့နယ်ဒေသခံ local PDFများ ပူးပေါင်းကာ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း ဖော်ပြသည်။
ထိုတိုက်ခိုက်မှုကြောင့် ဗိုလ်အောင်ဒင် သီချင်းကို song box ဖြင့်ဖွင့်ကာ မြို့ပေါ်တွင်လှည့်လည် မိုက်ကြေးခွဲနေသော စစ်ကောင်စီတပ်လှည့်ကင်း(ဗိုလ်အောင်ဒင်အဖွဲ့)မှ တစ်ဦးသေဆုံးသွားသည်ဟု ဆိုသည်။
“မြို့ပေါ်ကိုလှည့်ပြီး ဗိုလ်အောင်ဒင်သီချင်းဖွင့်ပြီး ပြည်သူကိုစိန်ခေါ်တဲ့အဖွဲ့ကို (ဗိုလ်အောင်ဒင်အဖွဲ့)ပြောတာဗျ။ မြို့ပေါ်က စကစအထိုင်ချထားတဲ့ နေရာတော်တော်များများတိုက်ခိုက်ခဲ့တာ”ဟု ကျားသစ်ပြောက်ကျားတပ်ဖွဲ့မှ ရဲဘော်တစ်ဦးက ပြောသည်။
Public Service Announcement
ဇူလိုင် ၂ ရက်ကလည်း ပုလဲနယ် ကံကြီးရွာသို့ဝင်လာသော အင်အား ၉၀ကျော်ပါ စစ်ကောင်စီတပ်စစ်ကြောင်းကို PDF ပူးပေါင်းတပ်များမှ မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ ၁၅ ဦးခန့်သေဆုံးပြီး အရာရှိတစ်ဦးလည်းပါဝင်ကြောင်း ကျားသစ်က အသိပေးသည်။
“ယမန်နေ့ကလဲ ၂ ရက်နေ့ ဖြစ်စဉ်တွင် သေဆုံးခဲ့သော အကောင်ကြီးကြီး အလောင်းကို ရ ဟတ်ယာဉ်(၂) စင်းဖြင့် လာရောက် သယ်ဆောင်သွားကြောင်း ဖရဲသီးထံမှ သိရှိရပါသည်”ဟု ထုတ်ပြန်သည်။
အထက်ပါ ပုလဲမြို့ပေါ်တိုက်ခိုက်မှုတွင် နာရီဝက်ကြာပစ်ခတ်ခဲ့ပြီး တပ်ပေါင်းစုများ ထိခိုက်မှုမရှိ ပြန်လည်ဆုတ်ခွာနိူင်ခဲ့ကြောင်း အသိပေးထားသည်။
