ထိုင်းရေနံကုမ္ပဏီ PTTEP ရန်ကုန်ရုံးခွဲအပါအဝင် စစ်ကောင်စီနှင့် ပတ်သတ်နေသည့် နေရာသုံးခုတွင် ယနေ့ ပေါက်ကွဲမှုဖြစ်ပွားခဲ့ကြောင်း ရန်ကုန်မြို့ခံများကပြောသည်။
မရမ်းကုန်းမြို့နယ်ရှိ ထိုင်းရေနံကုမ္ပဏီ၏ ရန်ကုန်ရုံးခွဲအတွင်း ယနေ့ နံနက် ၁၀နာရီခွဲခန့်၌ ပေါက်ကွဲမှုဖြစ် ပွားခဲ့ပြီး ထိခိုက်ဒဏ်ရာရရှိသူမရှိကြောင်းလည်း ဒေသခံများက ပြောသည်။
မရမ်းကုန်းမြို့နယ်၊ ဆည်မြောင်လမ်းရှိ အဆိုပါရုံး၏ ပထမထပ် ကားပါကင်၌ ပေါက်ကွဲမှုဖြစ်ပြီး ပေါက်ကွဲမှုအပြီးတွင် စစ်သားနှင့်ရဲများက ဝန်းတံခါးပိတ်ကာ စစ်ဆေးနေသည်ဟု မျက်မြင်သက်သေများက ပြောသည်။
“ထိုင်းကုမ္ပဏီက ထိုင်းအစိုးရပိုင်ကုမ္ပဏီပဲ၊ မြန်မာပြည်မှာ အထွေထွေမန်နေဂျာတစ်ယောက်က ကိုင်တွယ်နေတာ။ စစ်တပ်အတွက် ဒေါ်လာရှာပေးတဲ့ ရေနံကုမ္ပဏီတခုဆိုတာသေချာတယ်”ဟု ထိုင်းPTTEPကုမ္ပဏီဝန်ထမ်းဟောင်းတစ်ဦးက ပြောသည်။
Public Service Announcement
ထိုင်းPTTEPကုမ္ပဏီသည် စစ်ကောင်စီအတွက် နိုင်ငံခြားငွေ အဓိကရှာဖွေပေးနေသည့် ရေနံကုမ္ပဏီတစ်ခုဖြစ်ပြီး ၎င်းသည် မြန်မာ့ကမ်းလွန်ရှိ မုတ္တမပင်လယ် ကွေ့တွင် သဘာဝဓာတ်ငွေ့များ တူးဖော်ထုတ်လုပ်ကာ ထိုင်းနိုင်ငံကို တင်ပို့နေသည့် ကုမ္ပဏီတစ်ခုလည်းဖြစ်သည်။
ထိုင်းကုမ္ပဏီသည် စစ်တပ်အာဏာသိမ်းမှုကြောင့် ပြန်လည်ထွက်ခွာသွားသည် ရေနံနှင့်သဘာဝဓာတ်ငွေ့ကုမ္ပဏီများ၏ ရှယ်ယာများကို ဝယ်ယူပြီး စစ်ကောင်စီအတွက် နိုင်ငံခြားငွေရရှိအောင် ဆောင်ရွက်ပေးနေသည့် ကုမ္ပဏီတစ်ခု ဖြစ်သည်။
ထိုအတူ ရန်ကုန်မြို့လယ်တွင် ယနေ့ မွန်းတည် ၁၂နာရီခန့်က ကျောက်တံတားနှင့် ပန်းဘဲတန်းမြို့ရှိ လျှပ်စစ်မန်နေဂျာရုံးနှစ်ရုံးကို ဗုံးဖြင့်တိုက်ခိုက်ခဲ့သည်ဟု ဒေသခံများက ပြောသည်။ယင်း လျှပ်စစ်မီတာရုံးနှစ်ခုကို ဗုံးခွဲတိုက်ခိုက်ခြင်းသည် ရန်ကုန်မြို့ပြပျောက်ကြားတော်လှန်ရေးအဖွဲ့ဖြစ်သော Toxic Boy အဖွဲ့ကဆောင်ရွက်ခြင်းကြောင်း ထုတ်ဖော်ပြောကြားထားသည်။
