●သေနတ်ကျည်မှန်ထားသောကလေးငယ်ကိုစစ်သားများကရေအိုင်ထဲပစ်ချ၍ရေနစ်သေဆုံး၊ကလေးအလောင်းလာယူသောမိခင်၏ကားနှင့်လက်ဝတ်ရတနာများကိုပါလုယက်
စစ်ကိုင်းတိုင်း၊ ခင်ဦးမြို့နယ်တွင်ကျည်ထိမှန်ထားသောကလေးငယ်ကို ကယ်ဆယ်ရန်ကြိုးစားသည့်ပြည်သူ့ကာကွယ်ရေးတပ်ဖွဲ့ဝင်တစ်ဦးကျဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
အကြမ်းဖက်စစ်တပ်သည်ယနေ့ (ဇူလိုင်လ၂၆ရက်)နံနက်ပိုင်းက ခင်ဦးမြို့နယ်၊ မန်ကျီးကျေးရွာ အတွင်းသို့ဝင်ရောက်မွှေနှောက်ပြီး လက်နက်ကြီးလက်နက်ငယ်များဖြင့် ပစ်ခတ်နေ၍ ရွာသူရွာသားများ ထွက်ပြေးတိမ်းရှောင်ခဲ့ကြရသည်။
မန်ကျီးကျေးရွာတွင် အကြမ်းဖက်စစ်တပ်၏ ရမ်းသမ်းပစ်ခတ်မှုကြောင့် ၁၃နှစ်အရွယ်ကလေးငယ်တစ်ဦးလက်မောင်းနှင့်ရင်ဘတ်တွင်ကျည်ထိမှန်ဒဏ်ရာရရှိခဲ့ကာရွာသူရွာသားအချို့လည်း ပိတ်မိနေကြောင်း ဒေသခံများက ပြောသည်။
ထိုကလေးငယ်အား ဆေးကုသနိုင်ရန်ကယ်ထုတ်ရန်ကြိုးစားခဲ့သည့် ပြည်သူ့ကာကွယ်ရေးရဲဘော်တစ်ဦးကျဆုံးခဲ့ကြောင်းဒေသခံအချို့က ပြောသည်။
Public Service Announcement
အကြမ်းဖက်စစ်တပ်သည် ကျည်ထိကလေးငယ်ကို မန်ကျီးကျေးရွာအရှေ့ရှိရေအိုင်ပျက်ထဲပစ်ချခဲ့သဖြင့်ရေနစ်ပြီးသေဆုံးသွားကြောင်းဒေသခံများကပြောသည်။
၎င်းကလေး၏မိခင်က ကလေးအလောင်းကို ကားဖြင့်လာယူရာ မိခင်ဖြစ်သူ၏ လက်ဝတ်ရတနာများကိုလည်းအကြမ်းဖက် စစ်ကောင်စီတပ်သားများက လုယက်ခဲ့ပြီး လူကိုလည်း ရိုက်နှက်နှိပ်စက်ကာ ကားကိုလည်း ယူဆောင်သွားကြောင်း ဒေသခံများက ပြောသည်။
“လက်နက်ငယ် လက်မောင်းထိမှန်ခဲ့သောကလေးငယ်အား ဆေးကုသနိုင်ရန် ကယ်ထုတ်ခဲ့သော ကာကွယ်ရေးတစ်ဦး ကျဆုံးခဲ့သလိုကလေးငယ်ကိုပါ မူးထဲတွန်းချခဲ့သဖြင့်ရေနစ်သေဆုံးသွားခဲ့ပြီဟု ကနဦးသိရပါတယ်။”ဟု ခင်ဦးမြို့နယ်ဒေသခံကာကွယ်ရေး မဟာမိတ်အင်အားစု – Kurdaf က အသိပေးသည်။
အကြမ်းဖက်စစ်တပ်သည် ယနေ့နံနက် ၅နာရီခွဲဝန်းကျင်မှစတင်ကာ မန်ကျီးကျေးရွာအတွင်းသို့ ဝင်ရောက်ခဲ့ခြင်းဖြစ်ပြီး အနီးဝန်းကျင်ရှိ ကျေးရွာ၃ရွာမှ ဒေသခံများထွက်ပြေးတိမ်းရှောင်နေရသည်။
ခင်ဦးမြို့နယ်ရှိကျေးရွာများအားအကြမ်းဖက်စစ်တပ်က နေ့စဉ်နီးပါးစစ်ကြောင်းထိုးနေ၍ ဒေသခံ ၅၀၀၀ကျော် ထွက်ပြေးနေရသည်။
ယမန်နေ့ကလည်း ခင်ဦးနယ် အရှေ့ခြမ်း၊ ရွာစဥ်ကျေးရွာရှိ ပြည်သူပိုင်နေအိမ်များအားအကြောင်းမဲ့မီးရှို့ခဲ့သောစစ်ကြောင်းသည်ယနေ့နံနက်ပိုင်းက ခြေမြစ်ကျဥ်း(မြောက်)ရွာရှိ ပြည်သူပိုင် နေအိမ်များအား မီးရှို့နေကြောင်း ခင်ဦးမြို့နယ်သတင်းမှန်ပြန်ကြားရေးက အသိပေးသည်။
