ခေတ်ကာလ မကောင်းသည်ကို အကြောင်းပြုပြီး ခိုးမှု၊ ဖောက်ထွင်းမှု ကျူးလွန်သူများအား အရေးယူနိုင်ရေး အစိုးရ နှင့် ပြည်သူ ပူးပေါင်း လက်တွဲ ဖြေရှင်းကြရန် ဆောမြို့နယ် ပြည်သူ့အုပ်ချုပ်ရေးအဖွဲ့(ပအဖ)က ယနေ့ ထုတ်ပြန်ကြေညာခဲ့သည်။
ဆောမြို့နယ် အတွင်းရှိတရားဥပဒေ စိုးမိုးမှုမရှိသလောက်နီးပါးအားနည်းသော မြို့ပေါ် ရပ်ကွက်များတွင်ခိုးမှု၊အိမ်/ဆိုင် ဖောက်ထွင်းမှုများကို ဆိုးဆိုးဝါးဝါး ကျူးလွန်လျက်ရှိကြသည်ကို တွေ့မြင်ကြားသိနေရသည့်အပြင် အကြမ်းဖက် စစ်ကောင်စီမှနယ်မြေကျူးကျော်စဉ် ပြည်သူများက ဘေးလွတ်ရာ ရွှေ့ပြောင်းထားကြသော ပစ္စည်းဥစ္စာများကိုလည်း ပြည်သူအချင်းချင်း ခိုးယူမှုများ ကျူးလွန်လျက် ရှိကြောင်းကိုလည်း ကြားသိနေရသည်ဟု ထုတ်ပြန်ချက်၌ ဖော်ပြသည်။
အဆိုပါ ခိုးမှု၊ ဖောက်ထွင်းမှု ကျူးလွန်သူများအား ဖော်ထုတ်နိုင်ရေး ၊ အပြစ်ပေး အရေးယူနိုင်ရေး တို့ကို သက်ဆိုင်ရာ ပြည်သူ့ကာကွယ်ရေးတပ်မတော်(PDF)များ၊ ပြည်သူ့ကာကွယ်ရေးအဖွဲ့(ပကဖ)များ၊ ပြည်သူ့ရဲတပ်ဖွဲ့(NUG)၊ ပြည်သူလုံခြုံရေးအဖွဲ့(ပလဖ) များနှင့် ပူးပေါင်းဆောင်ရွက်သွားမည်ဖြစ်ပြီး ပြစ်မှု ကျူးလွန်ကြောင်း သက်သေအထောက်အထားခိုင်လုံပါက ပြင်းထန်စွာ အရေးယူသွားမည်ဟု အသိပေးထားသည်။
ထို့ကြောင့် ပြစ်မှုကျူးလွန်သူများ အနေဖြင့် အဆိုပါ ခိုးမှု ၊ ဖောက်ထွင်းမှုများအား ဆက်လက်မကျူးလွန်ကြရန် နှင့် ပြည်သူများမှလည်း ပြစ်မှု ကျူးလွန်သူများအား တွေ့ရှိပါက မှတ်တမ်းမှတ်ရာများကိုကူညီယူပေးပြီး ဆောမြို့နယ် ပြည်သူ့အုပ်ချုပ်ရေး အဖွဲ့သို့ ဖြစ်စေ၊ နီးစပ်ရာ ကာကွယ်ရေး၊လုံခြုံရေး အဖွဲ့များသို့ ဖြစ်စေ အကြောင်းကြားပေးရန် ဆော(ပအဖက)ထုတ်ပြန်ကြေညာခဲ့သည်။
Public Service Announcement
