စစ်ကိုင်းတိုင်း၊ ယင်းမာပင်မြို့နယ်ရှိ ပုထိုးသာကျေးရွာနှင့် ရင်ပေါင်တိုင်ကျေးရွာကို အကြမ်းဖက်စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ရဟတ်ယာဉ် သုံးစီးဖြင့် ပစ်ခတ်နေကြောင်း ဒေသတွင်းသတင်းရင်းမြစ်များက ပြောသည်။
ယနေ့(သြဂုတ် ၁၁ရက်) ညနေ ၃နာရီခန့်ကယင်းမာပင်မြို့နယ်၊ ပုထိုးသာကျေးရွာနှင့်
ရင်ပေါင်တိုင် ကျေးရွာတို့ကို စစ်ကောင်စီတပ်က Mi35ရဟတ်ယာဉ်၂စီးဖြင့် လေကြောင်းမှ ပစ်ခတ်တိုက်ခိုက်ခဲ့ပြီး ရိုးရိုးရဟတ်ယာဉ် တစ်စီးဖြင့် စစ်ကောင်စီတပ်သားများ နှစ်ကြိမ်တိတိ ချနေကြောင်း ယင်းမာပင်မြို့နယ်သတင်းမှန်ပြန်ကြားရေးက အသိပေးသည်။
ထိုသို့ ပစ်ခတ်မှုကြောင့် အရပ်သားပြည်သူများ ပိတ်မိနေပြီး လေကြောင်းတိုက်ခိုက်မှုကြောင့် အထိခိုက်များနိုင်ကြောင်း ဒေသခံတို့က ပြောသည်။
ယင်းမာပင်နယ် ဒေသခံတစ်ဦးက “ရဟတ်ယာဥ်နဲ့ ပစ်ခက်ပြီး ရင်ပေါင်တိုင်ရွာအနီးက အင်းထဲကို ရဟတ်ယာဥ်ပေါ်ကနေ စစ်ွေးတွေချနေတယ်လို့ ပြောတယ်။ ချောင်းယမားရေတွေကလာနေတော့ ပြေးလို့မရဘူး။အကုန်ပိတ်မိနေတယ်။”ဟု ပြောသည်။
စစ်ကောင်စီတပ်အား ခုခံတော်လှန်မှုအားကောင်းသည့် ယင်းမာပင်မြို့နယ်တွင် ဒေသတွင်းပြည်သူ့ကာကွယ်ရေးအဖွဲ့များနှင့် စစ်ကောင်စီတပ်တို့ မကြာခဏ ထိတွေ့တိုက်ပွဲများ ဖြစ်ပွားနေသည်။
သြဂုတ်လ၁၀ရက်နေ့ ည ၉နာရီ ၁၅မိနစ်ခန့်ကလည်း စစ်ကောင်စီတပ်က ယင်းမာပင်မြို့အနောက်ဘက်သို့ လက်နက်ကြီးများဖြင့် ရမ်းသမ်းပစ်ခတ်ခဲ့ရာ ပြောင်းပြာကျေးရွာ အတွင်း ကျရောက်ခဲ့ပြီး ဒေသခံပြည်သူ နှစ်ဦး ထိခိုက်ဒဏ်ရာရရှိခဲ့သေးသည်။