ပူးပေါင်းတပ်ဖွဲ့မှ ရဲဘော် လေးဦးကျဆုံး
အင်းတော် – ကျောင်းကုန်းလမ်းပိုင်းတိုက်ပွဲတွင် စစ်ကောင်စီတပ်သား ခြောက်ဦးသေဆုံးပြီး ပူး ပေါင်းတပ်ဖွဲ့မှ ရဲဘော် လေးဦးကျဆုံးခဲ့ကြောင်း Indaw Revolution – IR က ယနေ့(သြဂုတ် ၂၂ ရက်) ထုတ်ပြန်သည်။
တိုက်ပွဲဖြစ်စဥ်အရ သြဂုတ် ၂၀ရက်က အင်းတော် – ကျောင်းကုန်းလမ်းပိုင်းတွင် ထီးချိုင့်ဘက်မှ တက်လာသည့် အင်အား ၅၀ကျော်ပါ စစ်ကောင်စီတပ်ကို KIA၊ PDF နှင့် ပကဖ ပူပေါင်းတပ်ဖွဲ့များက တိုက်ခိုက်ခဲ့သည်ဟု ဆိုသည်။
တိုက်ပွဲမှာနံနက် ၉နာရီ မှ မွန်းလွဲ ၂နာရီအထိ စုစုပေါင်း နှစ်ကြိမ် အပြန်အလှန်ထိတွေ့တိုက်ပွဲဖြစ်ပွားခဲ့ကြောင်း ဖော်ပြသည်။
“၁၉ ရက်နေ့ကတည်းက တိုက်ပွဲ ဖြစ်ခဲ့တာ။အဲဒီမှာ စခ တွေဘက်က အင်အားထပ်တိုးပြီး ထီးချိုင့်ဘက်ကနေ ပြန်တက်လာတယ်။ကျွန်တော် တို့ဘက်က ကျသွားတာ ထီးချိုင့် ပကဖ က နှစ်ယောက်ရယ်။ PDF တစ်ယောက်ရယ်။KIA ဘက်က တစ်ယောက်ရယ်”ဟု IR တာဝန်ရှိသူက လူထုနွေဦးသို့ ပြောသည်။
လက်ရှိတွင် စစ်ကောင်စီတပ်မှာ ကျောင်းကုန်းကျေးရွာ၌ တပ်စွဲထားကြောင်း ၎င်းက အသိပေးသည်။
ယခုလ ၁၉ ရက်ကလည်း အင်းတော်မြို့နယ်၊ရေဝေတောင်တိုက်ပွဲ၌ စစ်ကောင်စီတပ်က ခုနှစ်ဦး သေဆုံးခဲ့ကြောင်း IR က ထုတ်ပြန်ထားသည်။