စစ်ကိုင်းတိုင်းအထက်ပိုင်း အင်းတော်မြို့နယ်ရှိ စစ်ကောင်စီလက်အောက်ခံ နဘားတန်ပိုဂိတ်အား ဝင်ရောက်စီးနင်းဖျက်ဆီးခဲ့ကြောင်း Indaw Revolution က ထုတ်ပြန်သည်။
ယနေ့(သြဂုတ် ၁၆ ရက်) နံနက် ၁၀နာရီတွင် စစ်ကောင်စီထံသို့ဝင်ငွေစီးဆင်းနေ သည့် ဆောက်လုပ်ရေးဝန်ကြီးဌာနပိုင်သည့် နဘားတန်ပိုဂိတ်ကို ကချင်လွတ်မြောက်ရေးတပ်မတော်(KIA) နှင့် PDFပူးပေါင်း ဝင်ရောက်စီးနင်း ခဲ့ခြင်းဟု ဆိုသည်။
ဝင်ရောက်စီးနင်းစဥ်အတွင်းအင်းတော်မြို့ ရိက္ခာကုန်းဘက်ရှိ စစ်ကောင်စီတပ် ဘက်မှ နဘားရွာ ဘက်သို့ လက်နက်ကြီးဖြင့် ပစ်ခတ်ခဲ့သော်လည်း လူထိခိုက်မှုမရှိခဲ့ပေ။
“ဂိတ်ဝန်ထမ်းလေးဦးမိတယ်။ လောလောဆယ် ထိန်းသိမ်းထားပြီး ပြန်လွှတ်ပေး မယ်လို့သိရ တယ်” ဟု Indaw Revolution တာဝန်ရှိသူက People’s Spring သို့ ပြောသည်။
ဝင်ရောက်စီးနင်းခဲ့သော နဘားတန်ပိုဂိတ်ကို မီးရှို့ဖျက်ဆီးခဲ့ကြောင်းလည်း သိရသည်။
ဒေသတွင်းစစ်ရေးအရ အင်းတော်-ဗန်းမောက်ကားလမ်းအား ယနေ့ (သြဂုတ် ၁၆ ရက်)ကစ၍ ယာယီပိတ်ပင်ကြောင်း Indaw Revolution က ထုတ်ပြန် ထားသည်။