တွံတေးမြို့နယ်တွင် စစ်ကောင်စီ၏ အထွေထွေအုပ်ချုပ်ရေးမှူးအစည်းအဝေးတက်ပြီးပြန်လာသည့် စစ်ကောင်စီခန့်အုပ်ချုပ်ရေးမှူးနှင့်အဖွဲ့ကို လမ်းမှစောင့်ကြို၍ ပစ်ခတ်တိုက်ခိုက်ခဲ့ရာ အုပ်ချုပ်ရေးမှူးအပါအဝင် ၆ ဦးသေဆုံးကြောင်း မြို့ပြပြောက်ကျားတပ်ဖွဲ့ – တွံတေးက ယနေ့(သြဂုတ် ၂၂) တွင် ထုတ်ပြန်သည်။
ယနေ့ညနေ ၄ နာရီခွဲခန့်က သဝန်းတောကျေးရွာနှင့် မြကန်သာကျေးရွာကြားလမ်းဆုံတွင် ဇီးဖြူကုန်းရွာအုပ် ချုပ်ရေးမှူးနှင့် ရာအိမ်မှူးများလိုက်ပါလာသည့် ယာဥ်တစ်စီးကို ပစ်ခတ်တိုက်ခိုက်ခဲ့ခြင်းဖြစ်ကြောင်း ဖော်ပြသည်။
“စကစ အစည်းအဝေးက ပြန်လာတဲ့ သဝန်းတောအုပ်ချုပ်ရေးမှူးနဲ့ ရာအိမ်မှူးတွေပါစီးလာတဲ့ကားကို လမ်းဆုံမကွေ့ခင် သေချာအလစ်အငိုက်ပစ်ခတ်တိုက်ခိုက်ခဲ့တာဖြစ်ပါတယ်”ဟု မြို့ပြပြောက်ကျားတပ်ဖွဲ့ – တွံတေးမှ ရဲဘော်တစ်ဦးက ပြောသည်။
သေနတ်များဖြင့်ပစ်ခတ်တိုက်ခိုက်မှုကြောင့် ဇီးဖြူကုန်းအုပ်ချုပ်ရေးမှူးခင်ညွှန့်၊ ရာအိမ်မှူးများဖြစ်သော အေးမြင့်၊ သန်းထွေး(ခ) ဗေဒါ၊ ဆယ်အိမ်မှူးများဖြစ်သော ဝင်းဇော်(ခ)မိုးထိ၊ ဆန်းလွင်(ခ)ဂျပန်ကော့၊ စစ်ကာင်စီထောက်တိုင် ဘိုဘိုနှင့် ၎င်းတို့၏ကားသမားတို့အား မြို့ပြပြောက်ကျားတပ်ဖွဲ့မှပစ်ခတ်ရှင်းလင်းရာခြောက်ဦးသေဆုံးပြီး ဆယ်အိမ်မှုးဆန်းလွင်(ခ)ဂျပန်ကော့မှာ ပြင်းထန် ဒဏ်ရာရရှိခဲ့သည်ဟု ထုတ်ပြန်သည်။
အဆိုပါတိုက်ခိုက်မှုအပြီးတွင် စစ်ကောင်စီတပ်က လုံခြုံရေးတင်းကျပ်၍ လမ်းဆုံလမ်းခွများပိတ်ဆို့စစ်ဆေးနေကြောင်းသိရသည်။
“စခ ရခတွေကတော့ လမ်းဆုံ လမ်းခွတွေမှာ ပိတ်ဆို့စစ်ဆေးမှုတွေလုပ်နေပါတယ် အဖွဲ့သားတွေလည်း အန္တရာယ်ကင်းစွာ ကျော်ဖြတ်နိုင်ခဲ့ပါတယ်ခင်ဗျ” ဟုမြို့ပြပြောက်ကျားတပ်ဖွဲ့ – တွံတေးမှ တာဝန်ရှိသူတစ်ဦးကပြောသည်။
၎င်းတို့သည် အကြမ်းဖက်စစ်ကောင်စီထောက်တိုင်အဖြစ် ပြည်သူများဆန္ဒထုတ်ဖော်စဉ်ကတည်းက ဆန္ဒပြပြည်သူများစာရင်းနှင့် ဓာတ်ပုံ၊ ဗွီဒီယိုဖိုင်များအားခိုးယူရိုက်ကူး၍ စစ်ကောင်စီထံပေးပို့ခြင်း၊ စစ်တပ်ခေါ်ကာပြည်သူများအားခြိမ်းခြောက်ခြင်း စသည်တို့ကိုကျူးလွန်ခဲ့သည်ဟုဖော်ပြထားသည်။
ကျေးရွာနေပြည်သူများ၏ နေအိမ်များအားလိုက်လံပြသ၍ ဖမ်းဆီးခိုင်းခြင်း၊ ချိတ်ပိတ်ရန်အကြမ်းဖက်စစ်ကောင်စီနှင့်ပူးပေါင်းဆောင်ရွက်ခြင်း၊ ပြည်သူ(၆၀)ဦးကျော်၏ အမည်၊ နေအိမ်နှင့် အချက်အလက်များအား ပြုစု၍ စစ်ကောင်စီထံပေးပို့ကာ ဖမ်းဆီးရန်ချဉ်းကပ်ဖိအားပေးခြင်းတို့ကို ကျူးလွန်ခဲ့ကြောင်း ဖော်ပြထားသည်။