မန္တလေးတိုင်း၊ မြင်းခြံ-တောင်သာလမ်းပေါ်ရှိ စစ်ကောင်စီတပ်၏ နန်းမြင့်တောင်စစ်ဆေးရေးဂိတ်ကို ဒေသတွင်းပြည်သူ့ကာကွယ်ရေးတပ်များကပစ်ခတ်တိုက်ခိုက်ခဲ့ပြီး ထိခိုက်မှုများရှိကြောင်းဒေသတွင်းသတင်းရင်းမြစ်များကပြောသည်။
စက်တင်ဘာလ ၉ ရက်နေ့ ညနေ ၅ နာရီခန့်က တောင်သာမြို့နယ်၊ နန်းမြင့်တောင်စစ်ဆေးရေးဂိတ်တွင်ရှိသော စစ်ကောင်စီတပ်များကို လက်နက်ကြီးဖြင့် ဝင်ရောက်ပစ်ခတ်တိုက်ခိုက်ခဲ့ရာ စစ်ကောင်စီဘက်က လေးဦးဒဏ်ရာရရှိခဲ့ပြီး သေဆုံးမှုရှိ၊မရှိကို စုံစမ်းနေဆဲဖြစ်ကြောင်း နွားထိုးကြီး PDF အဖွဲ့က သတင်းထုတ်ပြန်သည်။
နန်းမြင့်တောင်စစ်ဆေးရေးဂိတ်သည် ခရီးသွားပြည်သူများ၏ ကားနှင့်ဆိုင်ကယ်များအား စစ်ဆေးလေ့ရှိပြီး ငွေညှစ်ခြင်း၊ မသင်္ကါသူများအား ဖမ်းဆီးခြင်းများ ပြုလုပ်လေ့ရှိကြောင်း ဒေသခံများက ပြောသည်။
ဖြစ်စဥ်နှင့်ပတ်သက်ပြီး နွားထိုးကြီး PDF အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
အကြမ်းဖက်စစ်တပ်၏ ထိခိုက်မှုအခြေအနေနှင့်ပတ်သက်၍ People’s Springက သီးခြားအတည်ပြုနိုင်ခြင်းမရှိသေးပေ။
နွားထိုးကြီး PDFအဖွဲ့သည် ပြီးခဲ့သည့် စက်တင်ဘာလ ၄ ရက်နေ့ ညနေပိုင်းကလည်း နွားထိုးကြီးမြို့နယ်၊ ဝက်လူးကျေးရွာတွင် တပ်စွဲထားသော စစ်ကောင်စီတပ်အား ပစ်ခတ်တိုက်ခိုက်ခဲ့သေးသည်။