KNLAနှင့် KNDO ဘက်က ၁၃၇ဦးကျဆုံးပြီး စစ်ကောင်စီ၏ လေကြောင်း၊ လက်နက်ကြီး တိုက်ခိုက်မှုကြောင့် ပြည်သူ ၁၃၁ဦး အသက်ဆုံးရှုံး
စစ်ကောင်စီ၏ အခြေစိုက်စခန်းကြီး ၉ ခုကို တိုက်ခိုက်ဖျက်ဆီးနိုင်ခဲ့ဟု အသိပေး
စစ်တပ်အာဏာသိမ်းပြီးနောက် ကရင်အမျိုးသားအစည်းအရုံး(KNU) ကော်သူးလေအုပ်ချုပ်ရေးနယ်မြေများ၌ တိုက်ပွဲပေါင်း ခြောက်ထောင်ကျော်ဖြစ်ပွားခဲ့ပြီး စစ်ကောင်စီနှင့် ၎င်း၏ လက်ပါးစေ နယ်ခြားစောင့်တပ်ဖွဲ့(BGF) တပ်ဖွဲ့ဝင် စုစုပေါင်း ငါးထောင်ကျော်သေဆုံးခဲ့ကြောင်း KNUက ယနေ့ ထုတ်ပြန်သည်။
၂၀၂၁ ဇန်နဝါရီမှ ၂၀၂၂ ခုနှစ် ဩဂုတ်အထိ လပေါင်း (၂၀) အတွင်း ဖြစ်ပွားသော တိုက်ပွဲစာရင်း ကို ထုတ်ပြန်ခဲ့ခြင်းဖြစ်သည်။
အာဏာသိမ်းမှုဖြစ်စဉ် ဖြစ်ပွားပြီးသည့်နောက်ပိုင်းတွင် ထိတွေ့တိုက်ပွဲများ နေ့တိုင်းဖြစ်ပွားလျက်ရှိရာ လပေါင်း ၂၀အတွင်း ကရင်အမျိုးသားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ်ဖွဲ့ (KNDO) တပ်များနှင့် အာဏာသိမ်းအကြမ်းဖက်စစ်ကောင်စီတပ်၊ နယ်ခြားစောင့်တပ် (BGF)တပ်များအကြား တိုက်ပွဲကြီး၊ တိုက်ပွဲငယ်၊ ပျောက်ကြားတိုက်ပွဲပေါင်း ၆,၃၅၆ ကြိမ် ဖြစ်ပွားခဲ့သည်ဟု ဖော်ပြထားသည်။
တိုက်ပွဲများအတွင်း အာဏာသိမ်း အကြမ်းဖက်စစ်ကောင်စီတပ်နှင့် BGF တပ်များဘက်မှ ၅,၁၂၅ ဦး သေဆုံးခဲ့ပြီး ၄,၁၇၄ ဦး ဒဏ်ရာရရှိခဲ့ကြောင်း ထုတ်ပြန်သည်။
Public Service Announcement
KNLAနှင့် KNDO တပ်ဖွဲ့များဘက်က ၁၃၇ ကျဆုံးခဲ့ပြီး ၃၅၂ ဦး ထိခိုက်ဒဏ်ရာရရှိခဲ့ကြောင်း အသိပေးထားသည်။
KNLAနှင့် KNDO တပ်ဖွဲ့များမှ အာဏာသိမ်းအကြမ်းဖက် စစ်ကောင်စီတပ်များ၏ အခြေစိုက်စခန်းကြီး (၉)လုံးကို တိုက်ခိုက်ဖျက်ဆီးနိုင်ခဲ့ကြောင်း ဖော်ပြထားသည်။
အာဏာသိမ်းအကြမ်းဖက်စစ်ကောင်စီတပ်နှင့် BGF တပ်များက လူထုနေထိုင်ရာ နေရာများနှင့် လုပ်ငန်းခွင်များသို့ လက်နက်ကြီး စုစုပေါင်း ၄,၄၅၆လုံး ကို ရည်ရွယ်ချက် ရှိရှိ ပစ်ခတ်ခဲ့ပြီး
ရဟတ်ယာဉ်များ၊ တိုက်လေယာဉ်များ အသုံးပြုတိုက်ခိုက်ခဲ့ရာ လေကြောင်းတိုက်ခိုက်မှု ၁၁၇ ကြိမ် ရှိသည်ဟု ထုတ်ပြန်သည်။
ထိုသို့ ရည်ရွယ်ချက်ရှိရှိ လက်နက်ကြီးများပစ်ခတ်ခြင်း၊ လေကြောင်းတိုက်ခိုက်မှုများ ပြုလုပ်ခြင်းတို့ကြောင့် အပြစ်မဲ့ပြည်သူ ၁၃၁ ဦး သေဆုံးခဲ့ပြီး ၂၉၄ ဦး ထိခိုက်ဒဏ်ရာရရှိခဲ့ကြောင်း ဖော်ပြထားသည်။
ထို့ပြင် စစ်ကောင်စီနှင့် BGF တပ်များက အပြစ်မဲ့ပြည်သူလူထု ၄၁၂ဦးကို အကြောင်းမဲ့ ဖမ်းဆီးခဲ့ပြီး ခြိမ်းခြောက်စစ်ဆေးခြင်းများ၊ ပေါ်တာအဖြစ်အသုံးပြုခြင်းများ နှင့် လူသားဒိုင်းကာအဖြစ်အသုံးပြုခြင်းများ ပြုလုပ်ခဲ့ကြောင်း KNUက ထုတ်ပြန်သည်။
တိုက်ပွဲများ ဖြစ်ပွားခြင်း၊ အာဏာသိမ်း အကြမ်းဖက်စစ်ကောင်စီ တပ်များမှ ပြည်သူလူထုများ နေထိုင်သော ကျေးရွာများ၊ လုပ်ကိုင်စားသောက်သော လုပ်ငန်း ခွင်များ အတွင်းသို့ ရည်ရွယ်ချက်ရှိရှိ လက်နက်ကြီးများပစ်ခတ်ခြင်း၊ လေကြောင်းတိုက်ခိုက်မှုများ ပြုလုပ်ခြင်းတို့ကြောင့် ပြည်သူလူထု သုံးသိန်း ခုနစ်သောင်းကျော် သည် အိုးအိမ်များ လုပ်ငန်းခွင်များကို စွန့်ခွာပြီး အသက်ဘေးလုံခြုံရာနေရာဒေသများသို့ထွက်ပြေးတိမ်းရှောင်နေကြရကြောင်း ဖော်ပြထားသည်။
ထွက်ပြေးတိမ်းရှောင်နေကြရသော ပြည်သူလူထုများအတွင်းတွင် ကလေးသူငယ်များ၊ ကျောင်းသားကျောင်းသူ များ၊ မသန်စွမ်း သူများ၊ သက်ကြီးရွယ်အိုများလည်း အများအပြားပါဝင်ပြီး ထွက်ပြေးတိမ်းရှောင်နေကြရ သော ပြည်သူလူ ထုများ အတွက် လူသားခြင်းစာနာထောက်ထားမှုဆိုင်ရာ အကူအညီများလည်း အများအပြား လိုအပ်လျက်ရှိကြောင်း အသိပေးထားသည်။
