စစ်ကိုင်းတိုင်း ကန့်ဘလူမြို့နယ်တွင် စစ်ကောင်စီတပ်က လူနေကျေးရွာအတွင်း အကြမ်းဖက်ဝင်ရောက်ပစ်ခတ်တိုက်ခိုက်မှုကြောင့် လသားအရွယ်ကလေးတစ်ဦးအပါအဝင် သုံးဦး သေနတ်ကျည်ထိမှန်ဒဏ်ရာရခဲ့သည်။
ကန့်ဘလူမြို့နယ် မိဿလင်ကုန်းရွာနှင့်ချပ်ကုန်းရွာကို ယမန်နေ့( စက်တင်ဘာလ ၁၅ရက်)က စစ်ကောင်စီစစ်ကြောင်း ဝင်ရောက်တိုက်ခိုက်ခဲ့ခြင်းဖြစ်သည်။
” ရမ်းသမ်းပစ်ပြီး ရွာထဲ ဝင်လာတာ။ အရပ်သားတွေ ထိကုန်တယ်ဗျ။ အဲ့ဒီစစ်ကြောင်းက အခုထိရှိနေသေးတယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
စစ်ကောင်စီ၏ ပစ်ခတ်မှုကြောင့် မိဿလင်ကုန်းရွာမှာ အသက်(၇၆)နှစ်အရွယ် အဘိုးအိုတစ်ဦး၊ အသက် (၁၃)နှစ်အရွယ် ကလေးငယ်တစ်ဦးသေနတ်ကျည်ထိမှန်ခဲ့ပြီး
Public Service Announcement
လက်နက်ကြီးကျည် ကျရောက်ပေါက်ကွဲခဲ့သည့် ချပ်ကုန်းရွာမှ လသားအရွယ်ကလေးငယ်တစ်ဦးဒဏ်ရာရခဲ့သည်ဟု Kotaungbo Revolution – KTB-R Team က ထုတ်ပြန်သည်။ ဒဏ်ရာရသူများကို ဆေးကုသပေးနေရဆဲ ဟုဆိုသည်။
ထို့အပြင် မိဿလင်ကုန်းကျေးရွာမှ နေအိမ်လေးလုံးကိုလည်း စစ်ကောင်စီတပ်က မီးရှို့ဖျက်ဆီးသွားသည်။
ရှမ်းပြည်နယ် မိုးဗြဲမြို့နယ်တွင်လည်း ယနေ့ (စက်တင်ဘာ ၁၆ရက်) နံနက်အစောပိုင်းက စစ်ကောင်စီက ပစ်ခတ်သော လက်နက်ကြီးကျည်သည် စစ်ဘေးရှောင်စခန်းတစ်ခုသို့ ကျရောက်ပေါက်ကွဲပြီး ကလေးနှစ်ဦးအပါအဝင် စစ်ဘေးရှောင် လေးဦးသေဆုံးပြီး ၁၃ဦးဒဏ်ရာရသွားခဲ့သည်။
