ဒေါ်လာနှင့်ရွှေဈေးအတက်အကျကြမ်းနေ

▪︎​ငွေလဲ​ကောင်တာများတွင် ​ဒေါ်လာ​ဝယ်​ဈေးနှင့်​​ရောင်း​ဈေးကျပ် ၅၀၀ ခန့်ကွာဟနေ

ဒေါ်လာနှင့်ရွှေဈေးအတက်ကျကြမ်း​နေပြီးဝယ်​ဈေးနှင့် ရောင်းဈေး အဆမတန်ကွာခြားနေ​ကြောင်းလုပ်ငန်းရှင်များက​ပြောသည်။

ဒေါ်လာဝယ်ရောင်းဈေးသည် တစ်ဒေါ်လာကို ကျပ် ၅၀၀ခန့်ဈေးကွာနေပြီး ရွှေဈေးမှာလည်း တစ်ရက်အတွင်း ကျပ် ၁သိန်းခွဲကျော်အတက်ကျဖြစ်ခဲ့သည်။

အောက်တိုဘာ ၁ ရက်တွင် အမေရိကန် တစ်ဒေါ်လာလျှင် ငွေလဲကောင်တာများ၌ ရောင်းဈေးသည် တစ်ဒေါ်လာလျှင် ကျပ် ၂၉၀၀ ခန့်ရှိပြီး ဝယ်ဈေးသည် ၂၄၀၀ခန့်ရှိသည်ဟု ငွေလဲကောင်တာပိုင်ရှင်တစ်ဦးကပြောသည်။

“ဈေးနှုန်းတွေက အတက်အကျများနေလို့ ဝယ်ရောင်းလုပ်ရတာ ခဏနားထားရတယ်၊ ဒီဈေးနှုန်းတွေက မခန့်မှန်းတတ်အောင်ဖြစ်နေတယ်”ဟု ငွေလဲကောင်တာပိုင်ရှင်တစ်ဦးကပြောသည်။

Public Service Announcement

ပြည်တွင်းရွှေဈေးမှာလည်းအောက်တိုဘာ ၁ ရက်မနက်ပိုင်းတွင် အခေါက်ရွှေတစ်ကျပ်သားကို ၂၂ သိန်း​ကျော်( ၂,၂၇၀,၀၀၀)ပေါက်ဈေးရှိခဲ့သော်လည်း ညနေပိုင်းတွင်ကျပ် ၂၄သိန်း ( ၂,၄၂၅,၀၀၀)ကျပ်​ကျော်ဖြင့် ကျပ်တစ်သိန်း​ကျော်​ဈေးပြန်တက်ပြီးပိတ်ခဲ့သည်။

ပြီးခဲ့သည့် သြဂုတ်လတွင် ​​ဒေါ်လာ​ဈေး ၅၀၀၀ ကျပ်နှင့် ​ရွှေ​ဈေး ကျပ် ၃၅ သိန်း​​ကျော်အထိစံချိန်တင်မြင့်တက်ပြီး​နောက် စစ်​ကောင်စီက ရွှေဈေး၊ဒေါ်လာဈေးကျဆင်းရေးအတွက် ​ဝယ်​ရောင်းလုပ်​နေ​သောလုပ်ငန်းရှင်အချို့ကိုဖမ်းဆီးခြင်း ၊​ခေါ်ယူသတိ​ပေးခြင်းနှင့် စစ်ကောင်စီဘက်က ဝါဒဖြန့်ချီမှုများကို အင်တိုက်အားတိုက်ဆောင်ရွက်နေသည်။

“အွန်လိုင်းမှာသူတို့ဖြစ်ချင်တဲ့ ဈေးအတိုင်း ရောင်းရဝယ်ရတယ်။ အမှန်တကယ်ပေါက်ဈေးတင်ရင် ဖမ်းခံရမယ်။ တိုင်မယ်တောမယ်ဆိုပြီး ဖေ့ဘွတ်ခ်အကောင့်တုတွေနဲ့လာခြိမ်းခြောက်ကြတယ်”ဟုအွန်လိုင်းမှ နိုင်ငံခြားငွေ အရောင်းအဝယ်ပြုလုပ်နေသူတစ်ဦးကပြောသည်။

ပုံမှန်အားဖြင့် စက်တင်ဘာလသည် နိုင်ငံအတွင်း ဒေါ်လာလိုအပ်ချက်မြင့်မားသည့် ကာလဖြစ်ပြီး ဒေါ်လာဈေးမြင့်တက်လေ့ရှိသည်။ သို့​သော်ယခုအခါစစ်ကောင်စီက နိုင်ငံခြားငွေအရောင်းအဝယ်ပြုလုပ်သူများကို ဖမ်းဆီးခြင်း၊ခြိမ်းခြောက်များပြုလုပ်ခြင်းနှင့် ကုမ္ပဏီများ စီးပွားရေးလုပ်ငန်းများ ရပ်ဆိုင်းသွားခြင်းကြောင့် ဒေါ်လာလိုအပ်ချက်လျော့သွားခြင်းဖြစ်သည်ဟု စီးပွားရေးလုပ်ငန်းရှင်များကသုံးသပ်သည်။

“ပြည်ပက သွင်းကုန်တွေကို လုံးဝနီးပါးပိတ်ထားတာရယ်။ စီးပွားရေးမလည်ပတ်နိုင်အောင် လုပ်ထားတာကြောင့် ဒေါ်လာဈေးက ကျနေတာလို့ပြောရမယ်။ ဒါကစိုးရိမ်စရာရှိတယ်။ တချိန်မှာ ဒေါ်လာလိုအပ်ချက်နည်းနည်းလေးရှိတာနဲ့ ဈေးက တရှိန်ထိုးတက်သွားလိမ့်မယ်”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးကပြောသည်။

စစ်တပ်အာဏာသိမ်းပြီးနောက် ဒေါ်လာဈေး တရှိန်ထိုးမြင့်တက်လာပြီး ၂၀၂၂ ဩဂုတ်လဆန်းတွင် တစ်ဒေါ်လာကို ကျပ် ၅၀၀၀ အထိမြင့်တက်ခဲ့သည်။စစ်ကောင်စီကမူ တစ်ဒေါ်လာကို ကျပ် ၂၁၀၀သာသတ်မှတ်ထားသည်။ ​ရွှေ​ဈေးမှာလည်း သြဂုတ်လကုန်ပိုင်းတွင် တစ်ကျပ်သားလျှင် ကျပ် ၃၅ ​​သိန်းဝန်းကျင်ရှိခဲ့သည်။