မန္တလေးတိုင်း၊ မြင်းခြံမြို့နယ်တွင် စစ်ကောင်စီတပ်၏ ဖမ်းဆီးခြင်းခံရသည့် လူငယ်တစ်ဦး ဖမ်းဆီးခံရပြီးနောက် ၃ နာရီအတွင်း သေဆုံးသွားခဲ့ကြောင်း ဒေသတွင်း သတင်းရင်းမြစ်များက ပြောသည်။
ပြီးခဲ့သည့် စက်တင်ဘာ၂၁ရက်နံနက်၄နာရီခန့်က မြင်းခြံမြို့နယ်၊ ရှားတောကျေးရွာနေ အသက်၂၀ခန့်ရှိ ကိုမိုးထက်သာဆိုသူအား စစ်ကောင်စီတပ်က လာရောက်ဖမ်းဆီးသွားခဲ့ကြောင်း၊ ဖမ်းဆီးပြီး ၃နာရီခန့်အကြာ နံနက်၇ခန့်တွင် စစ်တပ်နှင့်ပျူများ၏ ညှင်းပန်းနှိပ်စက်မှုများကြောင့် သေဆုံးသွားခဲ့ကြောင်း မြင်းခြံလူထုလှုပ်ရှားမှုကော်မတီက သတင်းထုတ်ပြန်သည်။
မိသားစုမှာ အလောင်းပင် ပြန်မရခဲ့ဘဲ ကြည့်ခွင့်ခေတ္တပေးပြီးနောက် မီးရှို့သင်္ဂြိုလ်ခဲ့ကြောင်း ဒေသခံများက ပြောသည်။
“တစ်ပတ်လောက်တောင် ရှိသွားပြီ။ မိသားစုကိုတော့ ကိုဗစ်နဲ့သေတယ်ဆိုပြီးပြောသေးတာ။”ဟု ဒေသခံတစ်ဦးက ပြောသည်။
Public Service Announcement
မြင်းခြံမြို့နယ်၊ ပျော်ဘွယ်စံပြရွာတွင်လည်း စက်တင်ဘာ၂၉ရက် နံနက်ပိုင်းက စစ်ကောင်စီခန့်အုပ်ချုပ်ရေးမှူး၏နေအိမ် ပစ်ခတ်ခံရပြီး သေနတ်၇လက်ဆုံးရှုံးခဲ့ပြီးနောက် ရွာအတွင်းရှိ လူငယ်ကျောင်းသားများနှင့် အိမ်ထောင်ဦးစီးများကို စစ်ကောင်စီတပ်က ဖမ်းဆီးစစ်ဆေးနေကြောင်း ဒေသခံများက ပြောသည်။
ယမန်နေ့(အောက်တိုဘာလ ၁ ရက်)ကလည်း မြင်းခြံမြို့နယ်၊ မြောက်ကျွန်းကျေးရွာရှိ စစ်ကောင်စီတပ်၏ ယာယီအခြေစိုက်စခန်းအား ဒေသကာကွယ်ရေးအဖွဲ့(၉)ဖွဲ့က အလစ်အငိုက်ဝင်ရောက်တိုက်ခိုက်ရာ စစ်ကောင်စီအရာရှိတစ်ဦးအပါအဝင် ၆ ဦးထက်မနည်း သေဆုံးခဲ့သေးသည်။
