ထိရောက်သော အရေးယူဆောင်ရွက်မှုသို့ အသွင် ပြောင်းရမည့် အချိန်ရောက်နေပြီဟုဆို
ကုလသမဂ္ဂလုံခြုံရေးကောင်စီအနေဖြင့် မြန်မာစစ်တပ်ကျူးလွန်သော ရက်စက်ကြမ်းကြုတ်မှုများနှင့်ပတ်သက်၍ အရေးယူနိုင်ရေးအတွက် နိုင်ငံတကာရာဇ၀တ်ခုံရုံး(ICC)ကို အဆိုပြုရမည်ဟု မြန်မာသံအမတ်ကြီး ဦးကျော်မိုးထွန်း ယမန်နေ့တွင် တိုက်တွန်းသည်။
(၇၇)ကြိမ်မြောက် ကုလသမဂ္ဂအထွေထွေညီလာခံ၏ ဆဋ္ဌမကော်မတီတွင် လူသားမျိုးနွယ်အပေါ် ကျူးလွန် သည့် ရာဇဝတ်မှုများဆိုင်ရာ အပြည်ပြည်ဆိုင်ရာကွန်ဗင်းရှင်းတစ်ရပ် ထွက်ပေါ်လာရေးအစီအစဥ် ဆွေးနွေးခဲ့ရာ ပြည်တွင်းလုပ်ဆောင်ချက်များဖြင့် မြန်မာပြည်သူများကို အကာအကွယ်မပေးနိုင်တော့သည့်အခြေအနေတွင် နိုင်ငံတကာအသိုင်းအဝန်းက အကာအကွယ်ပေးအပ်ရန် တာဝန်ရှိကြောင်း သံအမတ်ကြီးက ထောက်ပြဆွေးနွေးသည်။
အသက်အန္တရာယ်များကို ကာကွယ်ပေးရေးဟူသော နိုင်ငံတကာအသိုင်းအဝန်း၏ တာဝန်ဝတ္တရားအပေါ် လေးလေးနက်နက် မေးခွန်းထုတ်ရမည်ဖြစ်ပြီး စစ်တပ်မှ အပြစ်မဲ့ပြည်သူ များကို တရားမဝင်ညဉ်းပန်းနှိပ်စက် သတ်ဖြတ်နေခြင်းကို နိုင်ငံတကာက ဆိတ်ဆိတ်ထိုင်၍ လက်ပိုက်ကြည့်နေသည့် အနေအထားကို မြန်မာပြည်သူများက လက်မခံနိုင်သကဲ့သို့ ယခုအစည်းအဝေးခန်းတွင် ရှိသည့် မိမိတို့အနေဖြင့်လည်း မည်သို့မျှလက်ခံနိုင်မည် မဟုတ်ကြောင်း ဦးကျော်မိုးထွန်းက ပြောသည်။
နိုင်ငံတကာဥပဒေပညာရှင်များက စစ်တပ်၏ လုပ်ဆောင်ချက်များကို လူသားမျိုးနွယ်အပေါ် ကျူးလွန်သည့် ရာဇဝတ်မှုမြောက်သည်ဟု သဘောတူညီထားပြီးဖြစ်ကာ စစ်တပ်အနေဖြင့် မြန်မာနိုင်ငံ အတွင်းရှိ ရိုဟင်ဂျာများအပါအဝင် လူနည်းစုများအပေါ်၌ အဆိုပါပြစ်မှုများကို ဆယ်စုနှစ်ပေါင်းများစွာ ကျူးလွန်နေခဲ့ကြောင်း သံအမတ် ကြီးက အစီရင်ခံသည်။ ယင်းသို့ ပြစ်မှုကျူးလွန်နေသူများကို ဥပဒေကြောင်းအရ တရားစီရင်ရမည် ဖြစ်ကြောင်းလည်း ဆက်လက် တိုက်တွန်းသည်။
Public Service Announcement
ကုလသမဂ္ဂ၏ မြန်မာနိုင်ငံဆိုင်ရာလွတ်လပ်သော စုံစမ်းစစ်ဆေးမှုယန္တရား IIMMမှ စုဆောင်းရရှိထားသည့် အချက်အလက်များအရလည်း မြန်မာစစ်တပ် ၏ ဒဏ်ခတ်ခြင်း မခံရသည့်အစဉ်အလာကို အပြီးတိုင်ရပ်တန့်ရန် အချိန်တန်ပြီဟု အတည်ပြုထားပြီး ယခုအချိန်သည် စုဆောင်းရရှိထားသည့် အချက်အလက်များကို ထိရောက်သော အရေးယူဆောင်ရွက်မှုသို့ အသွင်ပြောင်းရမည့် အချိန်ရောက်နေပြီဖြစ်ကြောင်း သံအမတ်ကြီးက ပြောသည်။
ကုလသမဂ္ဂလုံခြုံရေးကောင်စီသည် ယခင်က နှစ်ကြိမ်နှစ်ခါ ဆောင်ရွက်ခဲ့သော အစဉ်အလာရှိခဲ့သည့်အတိုင်း မြန်မာစစ်တပ်မှ ကျူးလွန်ထားသည့် ရက်စက်ကြမ်းကြုတ်မှုများနှင့်ပတ်သက်၍ ရရှိထားသော သက်သေအထောက်အထားများကို အသုံးပြု၍ အရေးယူပေးနိုင်ရေးအတွက် ICC သို့ အဆိုပြုရမည်ဟု ၎င်းက တိုက်တွန်းခဲ့သည်။
