စစ်ကိုင်းတိုင်း၊ မုံရွာ – မန္တလေးလမ်းမကြီးပေါ်တွင် တိုက်ခိုက်ခံရ၍ ထိခိုက်သူများအား သယ်လာသော စစ်ကောင်စီတပ်ယာဥ် ထပ်မံမိုင်းဆွဲတိုက်ခိုက်ခံရပြီး ငါးဦးသေဆုံးကြောင်း မုံရွာမြို့နယ်တောင်ပိုင်းပြည်သူ့ကာကွယ်ရေးတပ်ဖွဲ့ PDF-South Monywaအဖွဲ့က ပြောသည်။
ယမန်နေ့(အောက်တိုဘာလ ၁၁ ရက်) ည ၇ နာရီခန့်က မုံရွာ – မန္တလေးလမ်းမကြီး၏ မုံရွာ-ချောင်းဦးလမ်းပိုင်း၌ ချောင်းဦးမှ မုံရွာမြို့ဘက်သို့ ထိခိုက်ဒဏ်ရာရလာသည့် စစ်ကောင်စီတပ်သားများအား တင်ဆောင်လာသော စစ်ကားကြီးတစ်စီးအား ပဒေသာမိုင်း သုံးလုံးဖြင့် တိုက်ခိုက်ခဲ့ကြောင်း PDF-South Monywaအဖွဲ့ ပြောရေးဆိုခွင့်ရှိသူ Daung Karyan က ပြောသည်။
ထိုသို့ တိုက်ခိုက်မှုကြောင့် ကားမှန်များကွဲကြေ၍ ကြောက်လန့်တကြား မောင်းပြေးသွားကြပြီး မုံရွာမြို့သို့အရောက် သေလုမျောပါးဒဏ်ရာရထားသူများအနက် ငါးဦးသေဆုံးခဲ့ကြောင်း၊ ထပ်မံထိခိုက်ဒဏ်ရာရသူများလည်းရှိကြောင်း Daung Karyan က ပြောသည်။
“မနေ့ကနေ့လယ်က မိုင်းအဆွဲခံရပြီးဒဏ်ရာရတဲ့သူတွေသယ်လာတဲ့ကားပါ။”ဟု PDF-South Monywa ပြောရေးဆိုခွင့်ရှိသူ Daung Karyan က ပြောသည်။
Public Service Announcement
မုံရွာ – မန္တလေးလမ်းမကြီးပေါ်တွင် စစ်ကောင်စီယာဥ်များ ဖြတ်သန်းသွားတိုင်း လမ်းတစ် လျှောက်ရှိ ဒေသကာကွယ်ရေးအဖွဲ့များက မိုင်းဆွဲတိုက်ခိုက်လေ့ရှိသည်။
