ရန်ကုန်မြို့ ကြည့်မြင်တိုင်မြို့နယ် မကျည်းတန်းတောင်ရပ်ကွက် ကမ်းနားလမ်းပေါ်ရှိ မြို့နယ်တရားရုံးအား ယနေ့ (အောက်တိုဘာ ၁၅) နံနက် ၈နာရီခွဲဝန်းကျင်တွင် Brave Eagles(UG) အဖွဲ့နှင့် Dark Shadow (UG) မှ ပူးပေါင်း၍ ရီမုမိုင်းဖြင့် ဖောက်ခွဲတိုက်ခိုက်ခဲ့ကြောင်း အဆိုပါအဖွဲ့က ထုတ်ပြန်သည်။
“ကြည့်မြင်တိုင်မြို့နယ် မတရားရုံးကို ရီမုမိုင်းနှစ်လုံးဖြင့်တိုက်ခိုက်ခဲ့ရာ တစ်လုံးပေါက်ကွဲပြီး ကျန်တစ်လုံးကို စစ်သားတွေ ရှာဖွေတွေ့ပြီး ဖောက်ခွဲလိုက်ပါတယ်။ ကျွန်တော်တို့ ရဲဘော်တွေ ဘေးကင်းစွာ ပြန်လည်ဆုတ်ခွာနိုင်ခဲ့ပါတယ် “ဟု Dark Shadow (UG) အဖွဲ့က ဆိုသည်။
ယင်းတိုက်ခိုက်မှုကြောင့် ကြည့်မြင်တိုင်မြို့နယ် တရားရုံးရှိ ပြတင်းပေါက်မှန်အချို့နှင့် အဆောက်အဦးအချို့ ထိခိုက်ပျက်ဆီးခဲ့ကြောင်း ရပ်ကွက်နေပြည်သူတစ်ဦးက ပြောသည်။
“မနက်က ကြည့်မြင်တိုင် တရားရုံးမှာ ဗုံးပေါက်တာ ပြတင်းပေါက်နဲ့ အုတ်နံရံအချို့ ပျက်ဆီးသွားတယ်လို့ သိရတယ်။ လူထိခိုက်မှု မရှိပါဘူး။ ဗုံးတစ်လုံးက အရင်ပေါက်ပြီး နောက်တစ်လုံးက ၉ နာရီကျော်လောက်မှာ စစ်တပ်က ကမ်းနားလမ်းကို ပိတ်ပြီး ဖောက်ခွဲလိုက်တာပါ “ဟု ၎င်းက ပြောသည်။
Public Service Announcement
နောက်နောင်တွင်လည်း အကြမ်းဖက်စစ်ကောင်စီ၏ ထောက်တိုင်များဖြစ်သော အုပ်ချုပ်ရေး၊ စီပွားရေး၊ လူမူရေးပစ်မှတ်များအား ထိရောက်ပြင်းထန်စွာတိုက်ခိုက်သွားမည် ဖြစ်ကြောင်း Dark shadow (UG)က ဆိုသည်။
ထို့ကြောင့် ပြည်သူများအနေဖြင့် အကြမ်းဖက်စစ်ကောင်စီ ထောက်တိုင်အဖွဲ့အစည်းများနှင့်အဆောက်အဦးများအနီးသို့ ဖြတ်သန်းသွားလာခြင်းမပြုပဲ ဝေးဝေးမှဂရုစိုက် ရှောင်ရှားသွားကြရန် မြို့ပြပြောက်ကျားတပ်ဖွဲ့များက မေတ္တာရပ်ခံထားသည်။
