တန့်ဆည်၌ နှစ်ရက်ဆက်တိုက်ပွဲဖြစ်ပြီး စစ်ကောင်စီတပ် အထိနာ

စစ်ကိုင်းတိုင်း၊ တန့်ဆည်မြို့နယ်တွင် စစ်ကောင်စီတပ်နှင့်ဒေသကာကွယ်ရေးအဖွဲ့များ နှစ်ရက်ဆက်တိုက်ပွဲဖြစ်ပွားခဲ့ပြီး စစ်ကောင်စီတပ် အထိနာသွားကြောင်း တန့်ဆည်မြို့နယ်ပြည်သူ့ကာကွယ်ရေးတပ် ဖွဲ့က သတင်းထုတ်ပြန်သည်။

ယမန်နေ့ (အောက်တိုဘာ ၁၅ ရက်)က ခမရ(၃၆၈)မှ အင်အား ၁၀၀ကျော်ခန့်ပါ စစ်ကောင်စီတပ်နှင့်ပျူစောထီးများသည် တန့်ဆည်နယ် ရွာသစ်ကျေးရွာဘက်သို့ ထွက်လာခဲ့သည်။

ထို့နောက် ရွာအဝင်တွင် ပကဖအဖွဲ့က တိုက်မိုင်း ၂လုံးဖြင့်တိုက်ခိုက်ခဲ့ရာ ထိခိုက်သေဆုံးမှုရှိနိုင်ပြီး အပြန် အလှန်ပစ်ခတ်မှုလည်းရှိခဲ့ကြောင်း တန့်ဆည် (ပကဖ) အဖွဲ့က အသိပေးသည်။

ယနေ့ (အောက်တိုဘာ ၁၆ရက်) နံနက် ၇နာရီခွဲတွင် ဝရငယ်ရွာအနောက် မူးဘောင်တံတား၌ စစ်ကောင်စီတပ်များဖြတ်သန်းလာချိန် KPKအဖွဲ့ထောင်ထားသည့် တိုက်မိုင်းမိခဲ့ကြောင်း၊ ထို့နောက် မူးဘောင်အနောက် ဖက်၌ ပထမကြိမ်ထိတွေ့မှုဖြစ်ပွားခဲ့ရာတိုက်ပွဲပြင်းထန်ခဲ့ကြောင်း တန့်ဆည်(ပကဖ)အဖွဲ့က ပြောသည်။

Public Service Announcement

ထို့နောက် နံနက် ၁၁ နာရီခန့်တွင် စစ်ကောင်စီတပ် သည် အနောက်မြောက်ဘက် ချောင်းဦးရွာသို့ ဦးတည်လာပြီး ရွာအဝင်တွင် ဒုတိယကြိမ် ထိတွေ့မှုဖြစ်ခဲ့ရာ ရှော့ဒုန်းများဖြင့်လည်း ပစ်ခတ်နိုင်ခဲ့သည်ဟု တန့်ဆည်(ပကဖ)အဖွဲ့က ဆိုသည်။

စစ်ကောင်စီတပ်နှင့်ပျူများ ထိခိုက်သေဆုံးနိုင် ခြေရှိကြောင်း၊ ထိတွေ့တိုက်ပွဲနှစ်ကြိမ်ကို တန့်ဆည် (ပကဖ)၊ တပ်ရင်း -၆၊တပ်ရင်း – ၂၅(TPC)တို့မှ ပူးပေါက်တိုက်ခိုက်ခဲ့ပြီး တပ်ရင်း(၁၀)မှ ရှော့ဒုန်းဖြင့် ပစ်ခတ်ခဲ့ကြောင်း အသိပေးထားသည်။

ဖြစ်စဥ်နှင့်ပတ်သက်၍ တန့်ဆည်(ပကဖ)အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။

အောက်တိုဘာ ၈ ရက်က တန့်ဆည်နယ်တွင် စစ်ကောင်စီတ​ပ်နှင့် ဒေသကာကွယ်ရေးအဖွဲ့များ တိုက်ပွဲဖြစ်ပွားရာ ပြည်သူ့ရဲဘော် ၇ဦးကျဆုံးခဲ့သေးသည်။