ရွှေဘိုမြို့အဝင် စစ်ဆေးရေးဂိတ်ကို လက်နက်ကြီးဖြင့်ထု

စစ်ကိုင်းတိုင်း၊ ရွှေဘိုမြို့အဝင်မုခ်ဦးအနီးတွင် ပြည်သူ့ဆိုင်ကယ်များ အဓမ္မသိမ်းယူနေသော စစ်ကောင်စီစစ်ဆေးရေးဂိတ်ကို လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း BLACK WOLF-ARMY အဖွဲ့ ပြန်ကြားရေးတာဝန်ခံက ပြောသည်။

ယနေ့ (အောက်တိုဘာလ ၂၁ ရက်) နံနက်ပိုင်းက ရွှေဘိုမြို့တောင်ဘက် မြို့အဝင် မုခ်ပေါက်အနီးရှိ စစ်ဆေးရေးဂိတ်၌ ခရီးသွားပြည်သူများ၏ ဆိုင် ကယ်များအား အဓမ္မသိမ်းဆည်းနေသော ၁၁ ဦးခန့်ပါ စစ်ကောင်စီတပ်ကို (၄၀)မမ နှစ်လုံးဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း BLACK WOLF-ARMY အဖွဲ့ ပြန်ကြားရေးတာဝန်ခံက ပြောသည်။

လက်နက်ကြီးမှာ ဂိတ်အတွင်းသို့ ကျရောက်ခဲ့ပြီး စစ်ကောင်စီတပ်ဖွဲ့ဝင်များ ထိခိုက်ဒဏ်ရာရရှိနိုင်သည်ဟု ဆိုသည်။

“အဲဒီဂိတ်က မနေ့ကအထိတော့ ဆိုင်ကယ်အစီး ၂၀ လောက်သိမ်းထားတယ်။ သူတို့အဲနားမှာ ကြာတော့ကြာနေပြီ။”ဟု BLACK WOLF-ARMYအဖွဲ့ ပြန်ကြားရေးတာဝန်ခံက ပြောသည်။

Public Service Announcement

ပြီးခဲ့သည့် အောက်တိုဘာ ၈ ရက်က ဝက်လက်နယ်အရှေ့ခြမ်း၌ တပ်ဖွဲ့ဝင် BW SNIPER နှင့် အခြားရဲဘော်များ၊ ပြည်သူများ ကျဆုံးခဲ့ရသော ဖြစ်စဥ်အတွက် လက်စားချေတိုက်ခိုက်ခြင်းဖြစ်ကြောင်း BLACK WOLF-ARMY အဖွဲ့ ပြန်ကြားရေးတာဝန်ခံက ပြောသည်။