မြန်မာ့အရေးနှင့်ပတ်သက်၍ အာဆီယံနိုင်ငံခြားရေးဝန်ကြီးများသည် အင်ဒိုနီးရှား၌ အောက်တိုဘာ ၂၇ ရက်တွင် တွေ့ဆုံဆွေးနွေးကြမည်ဟု ကမ္ဘောဒီးယားနိုင်ငံခြားရေးဝန်ကြီးက ယမန်နေ့တွင် ပြောသည်။
အာဆီယံအတွင်းရေးမှူးချုပ်ရုံးစိုက်ရာ ဂျာကာတာ၌ တွေ့ဆုံမည့် အထက်ပါဆွေးနွေးမှုသည် မြန်မာနိုင်ငံအတွင်းဖြစ်ပွားနေသည့် ပဋိပက္ခများအဆုံးသတ်ရေး ယမန်နှစ်က ချမှတ်ခဲ့သော ဘုံဆုံးဖြတ်ချက် ၅ ရပ်အကောင်အထည်ဖော်ရေးကို လွှမ်းခြုံပါဝင်မည်ဟု ကမ္ဘောဒီးယားနိုင်ငံခြားရေးပြောခွင့်ရပုဂ္ဂိုလ်က Reuters သတင်းဌာနကို ပြောသည်။
ယခုတစ်ကြိမ်ဆွေးနွေးမှုသည် နိုဝင်ဘာတွင်ကျင်းပမည့် အာဆီယံထိပ်သီးညီလာခံမတိုင်မီ မြန်မာ့ငြိမ်းချမ်းလုပ်ငန်းစဥ်ရှေ့ဆက်နိုင်ရေး မည်သို့တွန်းအားပေးမည်ကို အကြံပြုချက်များ ထွက်ပေါ်ရန် အဖြေရှာကြမည်ဟု အထက်ပါပြောခွင့်ပုဂ္ဂိုလ်က ဆက်ပြောသည်။
အာဆီယံသည် အဖွဲ့ဝင်နိုင်ငံဖြစ်သော မြန်မာ့အရေးနှင့်ပတ်သက်၍ ငြိမ်းချမ်းရေးကြိုးပမ်းမှုများလုပ်ဆောင်နေသည့်တိုင် စစ်ကောင်စီက အတိုက်အခံများနှင့်ထိတွေ့ဆက်ဆံခြင်း၊ ရန်လိုမှုများ ရပ်စဲခြင်းများအပါအဝင် ဘုံဆုံးဖြတ်ချက် ၅ ရပ်အကောင်အထည်ဖော်မှုကင်းမဲ့၍ အဖွဲ့ဝင်နိုင်ငံအချို့က မကျေနပ်မှုများမြင့်တက်လာနေသည်။
ပြီးခဲ့သည့်လက မလေးရှားနိုင်ငံခြားရေးဝန်ကြီးက အာဆီယံသည် ဘုံဆုံးဖြတ် ချက် ၅ ရပ်ကို (လက်ရှိအချိန်တွင်)ကိုက်ညီမှုရှိ၊ မရှိကို လာမည့် နိုဝင်ဘာ(ထိပ်သီညီလာခံ)တွင် ဆုံးဖြတ် ရန်လိုအပ်ကြောင်း ပြောကြာထားသည်။