ကရင်အမျိုးသားအစည်းအရုံး ကော်သူးလေအုပ်ချုပ်မှုနယ်မြေ မူး(မုန်း)မြို့နယ်တွင် စစ်ကောင်စီတပ်က ဒေသခံအမျိုးသမီးတစ်ဦးကို ပစ်သတ်ခဲ့ပြီး ကြံစိုက်ခင်းနှင့် တဲများအား မီးရှို့ဖျက်ဆီးခဲ့သည်ဟု ကေအဲန်ယူက သတင်းထုတ်ပြန်ထားသည်။
အောက်တိုဘာလ(၂၂)ရက် နံနက်(၈)နာရီအချိန်အတွင် ကေအဲန်ယူ-ခလယ်လွီထူ(ညောင်လေးပင်)ခရိုင် မူးမြို့နယ်အတွင်းရှိ အောင်းလောင်းစိန်ကျေးရွာတွင် စစ်ကောင်စီတပ်သည် ဒေသခံနှစ်ဦး၏ တဲများကိုမီးရှို့ဖျက်ဆီးခဲ့ပြီး ကြံစိုက်ခင်းတစ်ခင်းကိုလည်း မီးရှို့ဖျက်ဆီးခဲ့သည်ဟု ကေအဲန်ယူက ထုတ်ပြန်ထားသည်။
ထို့အပြင် ကေအဲန်ယူ-မူးမြို့နယ်အတွင်းရှိ တတခေါ့ပွကျေးရွာတွင်နေထိုင်သည့် အသက်(၄၅)နှစ်အရွယ် အမျိုးသမီးတစ်ဦးကိုလည်း စစ်ကောင်စီတပ်မှ အကြောင်းမဲ့သတ်ဖြတ်ပစ်ခဲ့သည်ဟု ကေအဲန်ယူကဆိုသည်။
ကေအဲန်ယူ-ခလယ်လွီထူခရိုင် တပ်မဟာ(၃)နယ်မြေအတွင်းတွင် စစ်ကောင်စီတပ်သည် လက်နက်ကြီးများဖြင့် မကြာခဏဆိုသလို ပစ်ခတ်လျက်ရှိပြီး ဒေသခံပြည်သူများနှင့် ပြည်သူတို့၏ပိုင်ဆိုင်မှုများအား ပစ်မှတ်ထားတိုက်ခိုက် ဖျက်ဆီးသတ်ဖြတ်မှုများ လုပ်ဆောင်လျက်ရှိသည်ဟု ကေအဲန်ယူ၏ ထုတ်ပြန်ချက်အရ သိရသည်။