မြဝတီ – ‌ကော့ကရိတ် အာရှလမ်း အသုံးပြုသွားလာမှုကို သတိပေး

ကော့ကရိတ်မြို့တွင်းတိုက်ပွဲများကြောင့် မြ၀တီ-ကော့ကရိတ် အာရှလမ်းမကို အထူးသတိပြုသွားလာကြပါရန် ကော်သူးလေတပ်မတော်(KTLA) စစ်ဦးစီးချုပ် ဗိုလ်ချုပ်စောနယ်ဒါးမြက ယနေ့ အောက်တိုဘာလ(၂၆)ရက် ရက်စွဲဖြင့် ကြေညာချက်ထုတ်ပြန်သည်။

ကရင်ပြည်(ကော်သူးလေ)နယ်နိမိတ်အတွင်း စစ်ကောင်စီတပ်ဖွဲ့ဝင်များနှင့် ကော်သူးလေတပ်မတော်သားများ စစ်ရေးတင်းမာမှုများဖြစ်ပေါ်ပြီး တိုက်ပွဲအရှိန်အဟုန်မြင့်တက်လာမည်ဖြစ်သည့်အတွက် ပြည်သူများအနေဖြင့် ကော့ကရိတ်-မြ၀တီ အာရှလမ်း အသုံးပြုသွားလာခြင်းကို တိုက်ပွဲဖြစ်ပေါ်နေစဉ်ကာလအတွင်း သတိထားသွားလာအသုံးပြုရန် ဗိုလ်ချုပ်စောနယ်ဒါးမြက အသိပေးထားသည်။

ဒါ့အပြင် ပြည်သူများအနေဖြင့် ကော်သူးလေတပ်မတော်၏ ခွင့်ပြုချက်မရှိပဲ ကော့ကရိတ်-မြ၀တီ အာရှလမ်းပိုင်းတွင် သွားလာခြင်းမပြုရန် ဗိုလ်ချုပ်စောနယ်ဒါးမြက မေတ္တာရပ်ခံထားသည်ဟု ထုတ်ပြန်ချက်တွင်ပါရှိသည်။

မြ၀တီ-ကော့ကရိတ်အာရှလမ်းပိုင်းတွင် ပြီးခဲ့သည့် အောက်တိုဘာ(၁၈)ရက်နေ့မှစတင်ပြီး စစ်ကောင်စီတပ်နှင့် KNLA ပူးပေါင်းတပ်ဖွဲ့များအကြား ထိတွေ့မှုများစတင်ဖြစ်ပွားပြီး တိုက်ပွဲအခြေအနေများကြောင့် အာရှလမ်းပိုင်းတွင် ခရီးသွားလာမှုရပ်တန့်ကာ ယာဉ်အများအပြားပိတ်ခဲ့ရသလို ပြီးခဲ့တဲ့ရက်ပိုင်းက ခရီးသွားလာခွင့်ပြန်လည်ရရှိခဲ့ပေမယ့် ယမန်နေ့တွင်တော့ ယာဉ်နှစ်စီး မီးရှို့ခံထားရသည်။

Public Service Announcement

ယနေ့ အောက်တိုဘာ(၂၆)ရက်နေ့တွင်လည်း စစ်ကောင်စီတပ်နှင့် တော်လှန်ရေအင်အားစုတပ်များအကြား တိုက်ပွဲများဆက်လက်ဖြစ်ပွားနေပြီး ခရီးသွားပြည်သူများအနေဖြင့် သတိထားပြီးသွားလာနေကြရသည်ဟု ခရီးသွားပြည်သူတွေ၏ပြောကြားချက်အရ သိရသည်။