ကချင်ပြည်နယ် ဖားကန့်မြို့ အနန့်ပါ လေကြောင်းတိုက်ခိုက်မှုကြောင့် ကျဆုံးထိခိုက်သူများအပါအဝင် နွေဦးတော်လှန်ရေးတွင် ကျဆုံးခဲ့သူများအတွက် ဂုဏ်ပြုသည့်သဘောဖြင့် မီးပိတ်သပိတ်လှုပ်ရှားမှုပြုလုပ်ရန်တော်လှန်ရေးအင်အားစုများက တိုက်တွန်းထားသည်။
“ဖားကန့်-အနန့်ပါ လေကြောင်းတိုက်ခိုက်မှု စစ်ရာဇဝတ်မှုကြီးမှာ ကျဆုံး၊ ထိခိုက်ဒဏ်ရာရသူများ အပါအဝင် နွေဦးတော်လှန်ရေးနှင့် တော်လှန်ရေးအဆက်ဆက်မှာ ကျဆုံးရသူများအတွက် ဝမ်းနည်းကြေကွဲခြင်း၊ ဂုဏ်ပြုဦးညွှတ်ခြင်းအားဖြင့် မိမိတို့ပြည်သူအားလုံးက “မီးပိတ်သပိတ် လူထုလှုပ်ရှားမှု” ကြီး ဆင်နွှဲကြဖို့ ဖြစ်ပါတယ်။” ဟု ရေဘဝဲ ပြည်သူ့အကျိုးပြုလူငယ်အဖွဲ့အစည်းက ထုတ်ပြန်ထားသည်။
မီးပိတ်သပိတ်လှုပ်ရှားမှုကို အောက်တိုဘာ ၂၈ ရက်ည ည ၈နာရီခွဲမှစတင်၍ ၁၀မိနစ်ကြာ ပြုလုပ်ရန် တိုက်တွန်းထားထားသည်။
မီးပိတ်သပိတ်လှုပ်ရှားသည့်အချိန်တွင် နေအိမ်များ၊ လမ်းများ၊ အဆောက်အဦများ၌ မီးအားလုံးကို ပိတ်၍ အမှောင်ချထားရန်နှင့် မီးပိတ်သပိတ် လှုပ်ရှားမှုအပြင် ကျဆုံးပုဂ္ဂိုလ်များအတွက် မိမိတို့ ယုံကြည်မှု ဘာသာတရားအလိုက် ဆုတောင်းမှုများ၊ ကချင်လူထုနဲ့ အတူရပ်တည်ကြောင်း ရည်ညွှန်း သရုပ်ဖော်လှုပ်ရှားမှုများကိုလည်း တစ်ပါတည်း ဖော်ဆောင်ရန် တိုက်တွန်းထားသည်။
Public Service Announcement
“ဖားကန့်-အနန့်ပါမှသည် တိုင်းရင်းသား လူမျိုးပေါင်းစုံ သွေးစည်းညီညွတ်ရေးကို ဖော်ညွှန်းသည့် အောက်ပါ လူထုတိုက်ပွဲလှုပ်ရှားမှုကြီးကို လူထုအားလုံး တညီတညွတ်တည်း ဖော်ဆောင်၊ ဆင်နွှဲကြပါစို့။ဖားကန့်-အနန့်ပါ လေကြောင်းတိုက်ခိုက်မှု စစ်ရာဇဝတ်မှုကြီးအတွက် မိမိတို့ စိတ်ထဲကနေ ဝမ်းနည်း၊ ကြေကွဲ၊ နာကြည်းနေရုံမျှနဲ့ တင်းတိမ်မနေကြသင့်။ ဒီဝမ်းနည်းနာကြည်းစိတ်ကို တော်လှန်ရေးခွန်အားအဖြစ် လက်တွေ့ကျကျ ပြောင်းလဲဖော်ဆောင်ကြရမယ်။ဒီအတွက် ပြည်သူလူထုတရပ်လုံး၊ တနိုင်ငံလုံး ပါဝင်ဆင်နွှဲနိုင်မယ့် “လူထုတိုက်ပွဲ လှုပ်ရှားမှု” ကြီးတရပ် ဖော်ဆောင်ကြပါစို့။” ဟု Yangon Urban Guerillas -YUG က တိုက်တွန်းထားသည်။
ပြီးခဲ့သည့် အောက်တိုဘာ ၂၃ရက်က ကချင်ပြည်နယ်၊ ဖားကန့်မြို့ရှိ အနန့်ပါဒေသ ကံဆီးကျေးရွာတွင် ကချင်လွတ်လပ်ရေးတပ်မတော် (KIO)၏ (၆၂)နှစ်ပြည့်အထိမ်းအမှတ်အကြို ဂီတဖျော်ဖြေပွဲပြုလုပ်စဥ် အကြမ်းဖက်စစ်ကောင်စီတပ် လေကြောင်းမှ ပစ်ခက်တိုက်ခိုက်ခဲ့သဖြင့် အရပ်သားပြည်သူ ၅၀ကျော် အသက်ဆုံးရှုံးခဲ့ရပြီး အများအပြား ထိခိုက်ဒဏ်ရာရရှိခဲ့သည်။
