စစ်ကိုင်းတိုင်း မြောင်မြို့သို့ဦးတည်ကာ ချင်းတွင်းမြစ်ကြောင်းအတိုင်း စစ်ကောင်စီရေယာဉ်နှစ်စီးသည် ယနေ့ ဆန်တက်လာပြီး ရမ်းသမ်းပစ်ခတ်နေ၍ မြစ်ကမ်းဘေးရှိ ကျေးရွာငါးရွာမှ ဒေသခံများထွက်ပြေးတိမ်းရှောင်နေရသည်။
“တိုက်ရေယာဉ်ပါ ပါလာတယ်လို့ ကြားတယ်။ မြစ်ကြောင်းထဲကနေ ရမ်းသမ်းပစ်နေလို့ ဒေသခံတွေ ထွက်ပြေးနေရတယ်။ စစ်ကြောင်းကလည်း ထိုးနေတာမို့ ရွာကို ပြန်မကပ်နိုင်ဘဲ အကူအညီတွေလိုအပ်နေပါတယ်”ဟု မြောင်မြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးကပြောသည်။
စစ်ကောင်စီရေယာဉ်နှစ်စီးမှာ ယနေ့(နိုဝင်ဘာ ၆ရက်)နံနက်တွင် မြောင်နှင့်ချောင်းဦးမြို့နယ်အစပ်အနီး ဆင်ဖြုရှင်တံတားသို့ ရောက်ရှိလာပြီး ယင်းနေရာတွင် တပ်စွဲနိုင်သည်ဟု သတင်းများထွက်ပေါ်နေသည်။ စစ်ကောင်စီတပ်ဖွဲ့ဝင် ၇၀ဦးထက်မနည်း လိုက်ပါလာသည်ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
” အရာရှိပါတယ်ကြားတယ်။လူချင်းချိန်းမယ့်ပုံစံမှာရှိတယ်”ဟု ၎င်းက ပြောသည်။
ယနေ့ စစ်ကောင်စီစစ်ကြောင်းကြောင့် ကျောက်တန်းနှင့်သရက်ကုန်းကျေးရွာအပါအဝင် ကျေးရွာငါးရွာမှ ဒေသခံများ ထွက်ပြေးတိမ်းရှောင်နေရသည်။ စစ်ဘေးရှောင်များအတွက် စားနပ်ရိက္ခာလိုအပ်ချက်ကို ဒေသခံပြည်သူများက ဝိုင်းဝန်းကူညီပေးကြပါရန် မြောင်မြို့နယ်ပြည်သူ့အုပ်ချုပ်ရေးအဖွဲ့တာဝန်ခံက မေတ္တာရပ်ခံသည်။
မြောင်နယ်မှ စစ်ဘေးရှောင်များအား လှူဒါန်းလိုပါက မြောင်မြို့နယ်ပြည်သူ့အုပ်ချုပ်ရေးအဖွဲ့- မြိုင်(ပအဖ)၏ ဖေ့ဘွတ်စ်စာမျက်နှာ https://www.facebook.com/profile.php?id=100079992516614သို့ ဆက်သွယ်နိုင်ပါသည်။
“ရွာကလူတွေ တော်လှန်ရေးအတွက် ခံနေကြတာ ဒီထက်မကဘူး။ အိမ်မီးရှို့ခံ၊တောင်သူအလုပ်ပျက်၊ မြို့ကလူတွေလို အသာလေးနေလို့မရဘူး။ ကူရမယ့်အပိုင်းက မြို့ပေါ်က လူတွေအလုပ်ပေါ့ဗျာ”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။