ကျိုက်မရောရှိရဲစခန်းကို ပူးပေါင်းတပ်ဖွဲ့များဝင်တိုက်ပြီးနောက် စစ်တပ်ကလေကြောင်းတိုက်ခိုက်

မွန်ပြည်နယ် ကျိုက်မရောမြို့နယ် ချောင်းနှစ်ခွကျေးရွာတွင်ရှိသည့် ရဲစခန်းကို KNLA ပူးပေါင်းတပ်ဖွဲ့များက ယနေ့နံနက်ပိုင်းက ဝင်ရောက်တိုက်ခိုက်ခဲ့သည်။

ရဲတပ်ဖွဲ့များထိခိုက်သေဆုံးမှုရှိခဲ့ကာ စစ်ကောင်စီဘက်က လေကြောင်းနှင့်တုံ့ပြန်တိုက်ခဲ့သည်ဟုလည်း ဒေသခံများက ပြောသည်။

ယနေ့ နိုဝင်ဘာလ(၁၂)ရက် နံနက်အစောပိုင်းအချိန်က ကြာအင်းဆိပ်ကြီး-မုဒုံကားလမ်းပေါ် ကျိုက်မရောမြို့နယ် ချောင်းနှစ်ခွကျေးရွာတွင်ရှိသည့် စစ်ကောင်စီ၏ ချောင်းနှစ်ခွရဲစခန်းကို KNLA ပူးပေါင်းတပ်ဖွဲ့များမှ ဝင်ရောက်တိုက်ခိုက်ခဲ့ပြီး စစ်ကောင်စီရဲစခန်းကို သိမ်းပိုက်ရရှိခဲ့ကာ ရဲတပ်ဖွဲ့ဝင်များ သေဆုံးခဲ့သည်ဟု ကနဦးသိရသည်။

“ချောင်းနှစ်ခွရွာဘေးမှာရှိတဲ့ ရဲစခန်းကို လာပစ်တာ။ လေးဘက်လေးတန်ဝိုင်းပြီး ပစ်သွားတာ။ စခန်းကျသွားတယ်၊ ရဲ(၉)ဦးသေတယ်လို့ကြားတယ်။ စစ်တပ်ဘက်က လေယာဉ်နဲ့ ဗုံးလာကြဲနေတယ်” ဟု ဒေသခံတစ်ဦးက ပြောသည်။

Public Service Announcement

စစ်ကောင်စီတပ်ဘက်မှ လေကြောင်းဖြင့်တိုက်ခိုက်မှုကြောင့် ထိခိုက်မှုကိုတော့ မသိရှိရသေးပဲ ဒေသခံရွာသားများလည်း ဘေးလွတ်ရာကို တိမ်းရှောင်နေကြကြောင်း ဒေသခံများထံမှ သိရသည်။