စစ်ကြောင်းထိုးရင် အန္တရာယ်ရှိနိုင်သည်ဟုဆိုပြီး ကော်သူးလေအုပ်ချုပ်နယ်မြေ ခလယ်လွီထူ(ညောင်လေးပင်)ခရိုင်ထဲက ကွက်သစ်တစ်ချို့ကို စစ်တပ်က နေရာပြောင်းရွေ့နေထိုင်ရန် ပြောထားကြောင်းဒေသခံများက ပြောသည်။
“ရွှေကျင်-သံဆိပ်-ဘောကထာ ကားလမ်းဘေးကရွာတွေကို ယာယီရွှေ့ပြောင်းထားဖို့ ပြောတာက (၁၄) ရက် ကတည်းကပါ။ ကျွဲတဲကွက်သစ်နဲ့ ခြေတော်ရာ (ရှမ်းရွာ) ကိုတော့ (၂၁)ရက်က ထပ်ပြီးပြောပါတယ်။ သူတို့စစ်ကြောင်းထိုးလာရင် မလွတ်ဘူး၊ ထိခိုက်မှုတွေရှိလာရင်တာဝန်မယူနိုင်ဘူး၊ ကြိုတင်ရှောင်ထားဖို့ဆိုပြီး သတိပေးလာတာပါ။ သတိပေးတယ်ဆိုပေမယ့် တရားဝင်မဟုတ်ပါဘူး၊ သူတို့နဲ့ နီးစပ်တဲ့လူတွေကိုပဲ ရွေးပြီးသတိပေးသလိုမျိုး ပြောတာပါ။ ချက်ချင်းကြီးပြောင်းရွေ့ဖို့ဆိုတာကလဲ မဖြစ်နိုင်သေးလို့ အခြေနေကြည့်ပြီးပဲ နေကြရတယ် “ဟု သေခံတစ်ဦးက ပြောကြားကြောင်း KNU ထုတ်ပြန်ချက်တွင် ဖော်ပြထားသည်။
ညောင်လေးပင်ခရိုင် ရွှေကျင်မြို့စွန်နားရှိ ခြေတော်ရာ၊ ကျွဲတဲ၊ ကျွဲတဲကွက်သစ်မှ ဒေသခံများအား ရွှေ့ပြောင်းပေးဖို့ စစ်ကောင်စီတပ်ဘက်က ပြောဆိုမှုများနေကြောင်း ကေအဲန်ယူ-ကရင်အမျိုးသားအစည်းအရုံးက သတင်းထုတ်ပြန်သည်။
ကေအဲန်ယူ-ခလယ်လွီထူခရိုင် တပ်မဟာ(၃)နယ်မြေအတွင်းက ဘောကထာ၊ သံဆိပ်၊ တုံးတားတိုက်ပွဲအပြီး စစ်ကောင်စီဘက်က စစ်ကြောင်းထိုးရန် စီစဉ်နေခြင်းကြောင့် စစ်ကြောင်းထိုးချိန် ထိခိုက်မှုများ ရှိလာနိုင်သည်ဟုဆိုကာ ယာယီရွှေ့ပြောင်းထားပေးကြရန် ရဲနှင့်အုပ်ချုပ်ရေးအဖွဲ့များက လိုက်လံပြောဆိုခဲ့သည်ဟု ဒေသခံတစ်ဦးက ပြောသည်။
စစ်ကောင်စီတပ်ဘက်က ရွှေ့ပြောင်းခိုင်းသည့် ရပ်ကွက်(၃)ခုသည် ဒေသခံပြည်သူ(၅၀၀၀)ကျော် နေထိုင်သော ရပ်ကွက်များဖြစ်ကြပြီး နိုဝင်ဘာလ(၂၁)ရက်အထိ ဒေသခံများဘက်မှ ရွှေ့ပြောင်းမှုများမရှိသေးကြောင်း၊ ရွှေကျင်မြို့ပေါ်ရပ်ကွက်များတွင် လမ်းပေါ်ညအိပ်ထားသည့် ကားများအား အခြားနေရာလွတ်များတွင် ရွှေ့ပြောင်းထားရန်နှင့် စစ်ကောင်စီတပ်မှ ချောဆွဲပါက တာဝန်မယူနိုင်ကြောင်း လိုက်လံပြောဆိုမှုများရှိနေသည်ဟု သိရသည်။
လက်ရှိတွင် ရွှေကျင်ဘက်မှ KNLA တပ်များရှိရာနေရာသို့ စစ်ကြောင်းထိုးရန် စစ်ကောင်စီတပ်ဘက်က တင့်ကားအပါအဝင် အမြှောက်ကားနှင့် စစ်ကောင်စီတပ်သားများ စုဖွဲ့ပြင်ဆင်ထားပြီး ဒေသခံများ ရွှေ့ပြောင်းပေးရမည်ဟု သတင်းထွက်ပေါ်နေခြင်း၊ ညဘက်တွင် စစ်ကောင်စီတပ်က လက်နက်ကြီးရမ်းသမ်းပစ်ခတ်ခြင်း၊ တပ်အင်အားတိုးချဲ့နေခြင်းတို့ကြောင့် ဒေသခံပြည်သူများ ထိတ်လန့်စွာ နေထိုင်နေရကြောင်း ကေအဲန်ယူ၏ ထုတ်ပြန်ချက်အရ သိရသည်။