စစ်ကိုင်းတိုင်း၊ မုံရွာ – မန္တလေးလမ်းမကြီးပေါ်တွင် စစ်ကောင်စီ၏ ဆီဘောက်ဆာပါယာဥ်တန်းအား ပဒေသာမိုင်းဖြင့် နှစ်ကြိမ် မိုင်းခွဲတိုက်ခိုက်ခဲ့ရာ ငါးဦးခန့်သေဆုံးကြောင်း မုံရွာခရိုင်အမှတ်(၁၁)တပ်ရင်း People’s Defence Force – South Monywa၏ တာဝန်ခံ Daung Karyan က ပြောကြားသည်။
ယမန်နေ့ (နိုဝင်ဘာ၂၆ ရက်) ညနေ ၆နာရီခန့်က မုံရွာမှ မန္တလေးမြို့သို့သွားသော စစ်ကောင်စီ၏ မိုးကာအုပ်ကားကြီး နှစ်စီးနှင့် ဆီဘောက်ဆာကား တစ်စီးပါယာဥ်တန်းအား မုံရွာ-ချောင်းဦးလမ်းပိုင်းတစ်နေရာတွင် ကင်းပုန်းများ အထပ်ထပ်ချထားသည့်ကြားမှ ပွိုင့်တည့်တည့်ပေါ်အရောက် ငါးလုံးပါ ပဒေသာမိုင်း တစ်လုံးဖြင့် ဖောက်ခွဲတိုက်ခိုက်ခဲ့ကြောင်း PDF-South Monywa၏ တာဝန်ခံ Daung Karyan က ပြောကြားသည်။
ပထမဆုံးကားနှင့် အနီးရှိ ကင်းပုန်းများပါထိပြီး ငါး ဦးသေဆုံး၍ ခြောက်ဦးပြင်းထန်ဒဏ်ရာရရှိသွားသည်ဟု Daung Karyan က ဆိုသည်။
ကင်းပုန်းများက ရမ်းပစ်၍ PDF-South Monywa မိုင်းအဖွဲ့ဒုခေါင်းဆောင် အမှတ် (၂) တပ်ခွဲမှူးတစ်ဦးကျည်ထိခဲ့ပြီး အသက်အန္တရာယ် မစိုးရိမ်ရကြောင်း PDF-South Monywa၏ တာဝန်ခံ Daung Karyan က ပြောကြားသည်။
Public Service Announcement
ဆက်လက်ပြီး ၎င်းယာဥ်တန်းသည် ဆက်လက်ထွက်ခွာလာရာ ည ၇ နာရီခန့်တွင် မြင်းမူမြို့နယ်၊ ဂွေးပင်တောရွာအနီးအရောက်၌ ပဒေသာမိုင်းဖြင့် ထပ်မံတိုက်ခိုက်ခဲ့ကြောင်း PDF-South Monywaက ပြောသည်။
အဆိုပါ ယာဥ်တန်းအား ငါးလုံးပါ ပဒေသာမိုင်းဖြင့် ဖောက်ခွဲတိုက်ခိုက်ခဲ့ရာ မိုးကာအုပ်ကားကြီးတစ်စီးထိပြီး ကားပျက်စီးသွားကြောင်း PDF-South Monywa၏ တာဝန်ခံ Daung Karyan က ပြောသည်။
ဒုတိယမြောက်တိုက်ခိုက်မှုတွင် စစ်အုပ်စု၏ ထိခိုက်သေဆုံးမှုကို အတိအကျမသိရသေးဘဲ ရဲဘော်များမှာ အထိအခိုက်မရှိဟု PDF-South Monywaက အသိပေးထားသည်။
နိုဝင်ဘာ၂၅ ရက်ကလည်း မုံရွာ-မန္တလေးလမ်းမကြီးပေါ်တွင် စစ်ကိုင်းနှင့်မုံရွာတို့မှထွက်လာသည့် စစ်ကောင်စီယာဥ်တန်းများကို မုံရွာ-ချောင်းဦး-မြင်းမူ-စစ်ကိုင်း လမ်းပိုင်းတစ်လျှောက် ဒေသတွင်း PDFများက မိုင်းများဆက်တိုက်ခွဲကာတိုက်ခိုက်ခဲ့ကြပြီး ထိခိုက်သေဆုံးမှုများ ရှိခဲ့သည်။
