စစ်ကောင်စီရဲ့ အသင်းအဖွဲ့မှတ်ပုံတင်ခြင်းဆိုင်ရာဥပဒေပြင်ဆင်မှုကို ကုလ လွန်စွာစိုးရိမ်ဟုဆို

အာဏာသိမ်းစစ်ကောင်စီကအသင်းအဖွဲ့မှတ်ပုံတင်ခြင်းဆိုင်ရာဥပဒေကို ပြင်ဆင်ပြဌာန်းလိုက်ခြင်းနဲ့ပတ်သက်လို့ အလွန်အမင်းစိုးရိမ်တယ်လို့ အရှေ့တောင်အာရှဆိုင်ရာ ကုလသမဂ္ဂလူ့အခွင့်အရေးရုံး(OHCHR)က ယမန်​နေ့ကထုတ်ပြန်ပါတယ်။

စစ်ကောင်စီက ပြီးခဲ့တဲ့ အောက်တိုဘာ ၂၈ ရက်မှာ ပြင်ဆင်ပြဌာန်းခဲ့တဲ့ အသင်းအဖွဲ့မှတ်ပုံတင်ခြင်းဆိုင်ရာဥပဒေမှာ နိုင်ငံသားဆိုင်ရာအခန်းကဏ္ဍနဲ့ လူ့အခွင့်အရေးတွေအပေါ် ဆိုးကျိုးသက်ရောက်မှုရှိစေလို့ အခုလိုထုတ်ပြန်လိုက်တာလို့ ဆိုပါတယ်။

စစ်တပ်ဟာ ၂၀၂၁ ဖေဖော်ဝါရီ အာဏာသိမ်းဖို့ကြိုးပမ်းစဥ်ကစလို့ ဖြတ်လေးဖြတ်မဟာဗျူဟာကို ကျင့်သုံးခဲ့ရာ မြို့နယ်ပေါင်း ၂၀ ကျော်ကို အင်တာနက်ဖြတ်တောက်တာ၊ နိုင်ငံသားဆိုင်ရာအခန်းကဏ္ဍဆုတ်ယုတ်​စေတာ အပါအဝင် များပြားလှတဲ့အရေးယူကန့်သတ်မှုတွေကို လုပ်ခဲ့ပါတယ်။

စစ်တပ်ဟာ လွတ်လပ်စွာထုတ်ဖော်ပြောဆိုခွင့်နဲ့ စုဝေးခွင့်တို့လို အခြေခံကျတဲ့ အခွင့်အရေးတွေနဲ့ လွတ်လပ်မှု ကျင့်သုံးမှုတွေကို တားမြစ်ခဲ့ပါတယ်။ စစ်ကောင်စီ အခုပြင်ဆင်ပြဌာန်းတဲ့ အသင်းအဖွဲ့မှတ်ပုံတင်ခြင်းဆိုင်ရာဥပဒေကို လိုက်နာဖို့ပျက်ကွက်မယ်ဆိုရင် ထောင်ဒဏ် ၅ နှစ်အထိ ချမှတ်နိုင်တဲ့ ရာဇဝတ်မှုဆိုင်ရာပြစ်မှုအဖြစ်သတ်မှတ်ထားပါတယ်။

Public Service Announcement

OHCHR Myanmar အဖွဲ့ အကြီးအကဲ James Rodehaver က “အထူးသဖြင့် စစ်တပ်က သူတို့အာဏာသိမ်းမှုကို ဆန့်ကျင်သူတိုင်းကို စနစ်တကျ နှောင့်ယှက်ခြင်း၊ ဖမ်းဆီးခြင်းနှင့် တရားစွဲခြင်း​တွေကြောင့် နိုင်ငံအတွင်းမှာ အရပ်ဘက် အခန်းကဏ္ဍကဆိတ်သုဉ်း​နေပါပြီ”လို့ပြောပါတယ်။

သူကဆက်လက်ပြီး​တော့လည်း “ဒီဋစည်းမျဉ်းအသစ်​တွေက အသက်ရှင်သန်ရန် ရုန်းကန်နေရတဲ့လူဦး​ရေအတွက် မရှိမဖြစ်လိုအပ်တဲ့ ပစ္စည်း​တွေန့ ဝန်ဆောင်မှု​တွေကိုပေးပို့ကူညီနိုင်ဖို့အတွက် အရပ်ဘက်အဖွဲ့အစည်း​တွေလည်ပတ်ရန်နေရာလွတ်ကို သိသိသာသာ လျော့ပါးသွားစေနိုင်ပါတယ်”လို့ဆိုပါတယ်။