သေနတ်သုံးလက် သိမ်းဆည်းနိုင်ခဲ့
သေနတ်သုံးလက် သိမ်းဆည်းနိုင်ခဲ့မန္တလေးတိုင်း၊ ညောင်ဦးမြို့နယ်၊ စဉ့်ကူနယ်မြေရဲစခန်းမှ ရဲငါးဦး ဘီယာဆိုင်ထိုင်နေစဥ် ဝင်ရောက် တိုက်ခိုက်ခဲ့ရာ စခန်းမှူးအပါအဝင် ငါးဦးလုံးသေဆုံးပြီး သေနတ်သုံးလက်သိမ်းဆည်းနိုင်ခဲ့ကြောင်း ပခုက္ကူမြို့ပြပြောက်ကျားတပ်ဖွဲ့(တပ်ဖွဲ့-၂)က ထုတ်ပြန်သည်။
ယမန်နေ့ (ဒီဇင်ဘာ၁ ရက်)မွန်းလွဲ ၁နာရီခန့်ကညောင်ဦးမြို့နယ်၊ စဥ့်ကူရဲစခန်း၏ စခန်းမှူးအပါအဝင် ရဲငါးဦးသည် တက်မမှော်အတွင်းရှိ ဘီယာဆိုင်တစ်ဆိုင်တွင် ထိုင်နေချိန် ပခုက္ကူမြို့ပြပြောက်ကျားတပ်ဖွဲ့(တပ်ဖွဲ့-၂)က ကွန်မန်ဒို ရဲဘော် လေးယောက်ဖြစ်သော ရဲဘော်ဒီး၊ရဲဘော် ပုဂံကြီး၊ရဲဘော် ပုဂံလေးနှင့် ရဲဘော် King တို့က ဝင်ရောက်ပစ်ခတ်ရှင်းလင်းခဲ့ကြောင်း ပခုက္ကူမြို့ပြပြောက်ကျားတပ်ဖွဲ့(တပ်ဖွဲ့-၂)က အသိပေးသည်။
ထို့အပြင် ရဲအုပ်စုထံက G3 နှစ်လက်နှင့် အူဇီတစ်လက်သိမ်းဆည်းနိုင်ခဲ့ကြောင်း ပခုက္ကူမြို့ပြပြောက်ကျားတပ်ဖွဲ့က ထုတ်ပြန်သည်။
ပခုက္ကူမြို့ပြပြောက်ကျားတပ်ဖွဲ့ တပ်ခွဲ-၁ကသတင်းအချက်အလက် ထောက်လှမ်းပေးမှုဖြင့်အချိန်တစ်လကျော်ကြာပြင်ဆင်ခဲ့ကြောင်း၊ ထိုဖြစ်စဥ်အတွင်း ရဲဘော်တစ်ဦးပေါင်ကို ကျည်ထိမှန်ခဲ့သော်လည်း အသက်အန္တရာယ်မစိုးရိမ်ရကြောင်း ပခုက္ကူမြို့ပြပြောက်ကျားတပ်ဖွဲ့၏ ထုတ်ပြန်ချက်တွင် ဖော်ပြသည်။
Public Service Announcement
ထို့အပြင် ပြည်သူကို မတရားအခွန်ကောက်ခြင်း၊ လက်နက် အားကိုးဖြင့် အနိုင်ကျင့်ခြင်း၊ မတရားဥပဒေများဖြင့် ပြည်သူကို ဖိနှိပ်နှိပ်စက်နေသောကြောင့် တိုက်ခိုက်ခဲ့ခြင်းဖြစ်ကြောင်း ပခုက္ကူမြို့ပြပြောက်ကျားတပ်ဖွဲ့က အသိပေးသည်။
ဖြစ်စဥ်နှင့်ပတ်သက်၍ ပခုက္ကူမြို့ပြပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပေ။ ရဲအုပ်စု သေဆုံးမှုနှင့်ပတ်သက်၍ ထပ်မံအတည် ပြုနိုင်ခြင်း မရှိသေးပေ။
သို့သော် ၎င်းတို့တပ်ဖွဲ့မှာ အကြွေးသိန်း ၂၀၀နီးပါးရှိသည့်အပြင် စစ်ဆင်ရေးများသောကြောင့် ကျည်ဆံမလုံလောက်မှုများဖြစ်ပေါ်နေ၍ ပြည်သူများထည့်ဝင်လှူဒါန်းပေးရန် ပခုက္ကူမြို့ပြပြောက်ကျားတပ်ဖွဲ့က မေတ္တာရပ်ခံထားသည်။
