ရေစကြိုတွင်လည်း ထန်းမြစ်တူးသူတစ်ဦးကို စစ်ကောင်စီတပ်က ပစ်သတ်
မကွေးတိုင်း၊ ပခုက္ကူမြို့တွင် ဆိုင်ကယ်နှစ်ယောက်စီး၍ဆိုကာ အမျိုးသားနှစ်ဦး သေနတ်ဖြင့်ပစ်သတ်ခံရပြီး သေဆုံးသူတစ်ဦးမှာ စစ်ကောင်စီတပ်ဖွဲ့ဝင်တစ်ဦး၏ သားဖြစ်နေကြောင်း ဒေသခံများက ပြောသည်။
ယမန်နေ့(ဇန်နဝါရီ ၁၂ ရက်) မွန်းလွဲ ၂ နာရီခွဲခန့်က ပခုက္ကူစက်မှုဇုံနှင့် မြို့သစ်ကြား ကာနီပယ် KTV အနီးတွင် နှစ်ယောက်စီးလာသော ဆိုင်ကယ်တစ်စီးအား စစ်ကောင်စီတပ်များက လိုက်လံပစ်ခတ်ခဲ့ကြောင်း ၊ နှစ်ဦးလုံး နေရာ၌ ပွဲချင်းပြီးသေဆုံးပြီး တစ်ဦးမှာ စစ်ကောင်စီတပ်ဖွဲ့ဝင်တစ်ဦး၏ သားဖြစ်နေကြောင်း ဒေသခံများက ပြောသည်။
“သေတဲ့ နှစ်ယောက်မှာတစ်ယောက်က စစ်သားသားပါ။ ဖအေက တိုက်ပွဲကျသွားတာကြာပါပြီ။သားကမနေ့က ပစ်သတ်ခံရတာပါ။ နှစ်ယောက်ပေါင်း ၁၂ချက်ပစ်ထားတာပါ။ နှစ်ယောက်လုံးရဲ့ဖုန်း၊ဆိုင်ကယ်ကို ရဲတွေ သိမ်းပါတယ်။ပြန်မပေးပါဘူး”ဟု ဒေသခံတစ်ဦးက ပြောသည်။
အလားတူ ယမန်နေ့ကပင် ပခုက္ကူခရိုင်၊ ရေစကြိုမြို့နယ်တွင် ရာသီချိန် ထန်းမြစ်တူးသူတစ်ဦးကိုလည်း ဗုံးထောင်သည်ဟုဆိုကာ စစ်ကောင်စီတပ်က ပစ်သတ်သွားကြောင်း၊ အဆိုပါ အလောင်း သုံးလောင်းအား ပခုက္ကူဆေးရုံကြီးရင်ခွဲရုံ၌ ရောက်ရှိနေကြောင်း ဒေသခံများက ပြောသည်။
Public Service Announcement
စစ်ကောင်စီတပ်က သေဆုံးသူများအား PDFဟု လိမ်လည်သတင်းထုတ်ရန် ပြင်ဆင်နေပြီး မိသားစုဝင်များကိုပါ ခြိမ်းခြောက်ထားကြောင်း ဒေသခံများက ပြောသည်။
ပခုက္ကူမြို့တွင် စစ်ကောင်စီတပ်က ဆိုင်ကယ်တစ်စီး လူနှစ်ယောက်မစီးရန်နှင့် ညနေ ၆နာရီမှ နံနက် ၈ နာရီအတွင်း ဆိုင်ကယ်မစီးရအမိန့်ကို အဓမ္မ ထုတ်ပြန်ထားသည်။
