လေ​ကြောင်းတိုက်ခိုက်မှု ဆန့်ကျင်ကြောင်းပြသခဲ့သည့် ဟားခါးမြို့ရှိ ဆိုင်ရှင် (၁၁)ဦးကို စစ်ကောင်စီ ဖမ်းဆီးပြီး ဆိုင်များကို ချိတ်ပိတ်

ချင်းအမျိုးသားတပ်ဦး ၊ ချင်းအမျိုးသားတပ်မ​တော်(CNF/CNA)ဌာနချုပ်ကို စစ်ကောင်စီက လေကြောင်းမှ တိုက်ခိုက်၍ CNAတပ်ဖွဲ့ဝင်များ ကျဆုံးထိခိုက်ခဲ့မှုအ​ပေါ် ဝမ်းနည်းကြောင်း ပြသသည့်အနေဖြင့် စျေးဆိုင်ပိတ်ခဲ့သည့် ဟားခါးမြို့မှ ဆိုင်ရှင်(၁၁)ဦးကို စစ်​ကောင်စီက အဓမ္မဖမ်းဆီးပြီး ဆိုင်များအားချိတ်ပိတ်သွားကြောင်း ဟားခါးမြို့ခံများက ​ပြောသည်။

စစ်ကောင်စီသည် ဇန်နဝါရီ၁၂ ရက် နေလည်ပိုင်းက ဟားခါးမြို့ရှိ စျေးဆိုင်(၁၁)ဆိုင်ကို စာကပ်ချိတ်ပိတ်ပြီး ဆိုင်ရှင်များကို ဟားခါးမြို့မရဲစခန်းတွင် ဖမ်းဆီးခေါ်သွားသည်ဟု ဟားခါးမြို့ခံတစ်ဦးက ပြောသည်။

“ဆိုင်တွေကို သော့ခတ်ပြီး ဆိုင်ရှင်တွေကို ဟားခါးရဲစခန်းမှာ ဖမ်းထားတယ်။ အားလုံး ၁၁ယောက်လို့ သိရတယ်”ဟု ဟားခါးမြို့ခံတစ်ဦးက ပြောသည်။

“ယခု​နေအိမ်သည် အကြမ်းဖက်ကျူးလွန်သူတစ်ဦးအား ပုန်းအောင်းခွင့်ပေးခြင်းနှင့် ယာယီနေထိုင်ခွင့်ပေး​ကြောင်း ​ဖော်ထုတ်ရရှိသည့်အတွက် အကြမ်းဖက်မှု တိုက်ဖျက်​ရေး ဥပ​ဒေပုဒ်မ ၅၂အရ ​နေအိမ်အ​ဆောက်အဦ ပိုင်ရှင်အား အ​ရေးယူမည့်အပြင် ပုဒ်မ ၅၆ အရ​နေအိမ် ၊အ​ဆောက်အဦအား နိုင်ငံ​တော်ဘဏ္ဍာအဖြစ်သိမ်းဆည်းမည်ဖြစ်သည်”ဟုဆိုကာ ​လေ​ကြောင်းတိုက်ခိုက်မှုအ​ပေါ် ဝမ်းနည်း​ကြောင်းပြသသည့်ဆိုင်များကို အဆိုပါစာတမ်းချိတ်၍ ချိတ်ပိတ်ခဲ့သည်။

Public Service Announcement

ငြိမ်းချမ်းစွာ ဆိုင်ပိတ်ဆန္ဒထုတ်​ဖော်မှုအ​ပေါ် ထိုသို့စွပ်စွဲ၍ ပုဒ်မကြီး​လေးစွာဖြင့် အ​ရေးယူမှုအ​ပေါ် ​​မြို့ခံပြည်သူများ​က ဒေါသထွက်လျှက်ရှိသည်။

အကြမ်းဖက်စစ်ကောင်စီတပ်က ဇန်နဝါရီ ၁၀ရက်နှင့် ၁၁ ရက်က CNAဌာနချုပ်ကို ဗုံးကြဲတိုက်ခိုက်ခဲ့ခြင်းကြောင့် CNAတပ်သား ငါးဦးကျဆုံးခဲ့ပြီး ၁၀ဦးခန့် ဒဏ်ရာရရှိခဲ့သည်။

ထိုသို့ ဗုံးကြဲတိုက်ခိုက်မှုကို ဆန့်ကျင်ကြောင်းနှင့် သေဆုံးထိခိုက်ဒဏ်ရာရသူများအတွက် ဝမ်းနည်းကြောင်းအထိမ်းအမှတ်အဖြစ် ဟားခါးမြို့တွင် ဇန်နဝါရီ ၁၁ရက်က ဈေးဆိုင်များပိတ်၍ သ​ဘောထားပြသခဲ့ခြင်းဖြစ်သည်။

ထိုနေညနေပိုင်းတွင် စစ်ကောင်စီက ဈေးဆိုင်အားလုံးကို ပြန်ဖွင့်ရန်နှင့်မဖွင့်လှစ်ပါက အရေးယူမည်ဟု လိုက်လံခြိမ်းခြောက်ခဲ့သည်။