မကွေးတိုင်း၊ ရေစကြိုမြို့နယ်တွင် ကင်းပုန်းလာဝပ်သည့် စစ်ကောင်စီတပ်များအား ဒရုန်းဖြင့်နှစ်ကြိမ်တိုက်ခိုက်ရာ စစ်အုပ်စုထိခိုက်သေဆုံးမှုရှိနိုင်ကြောင်း ပြည်သူ့ကာကွယ်ရေးတပ်ဖွဲ့ -ရေစကြိုက သတင်းထုတ်ပြန်သည်။
ဇန်နဝါရီ ၁၉ရက် မွန်းလွဲ ၂နာရီခန့်က ရေစကြိုမြို့နယ်၊ ကြီးကန်ကျေးရွာသို့ ကင်းပုန်းလာဝပ်သော အင်အား ၁၅ဦးခန့်ပါသည့် စစ်ကောင်စီတပ်အား ဒရုန်းဖြင့် ဗုံးတစ်လုံးကြဲကာ စတင်တိုက်ခိုက်ခဲ့ကြောင်း ရေစကြို(ပကဖ)က အသိပေးသည်။
ထို့နောက် ညနေ ၃နာရီခန့်တွင်လည်း ဒရုန်းဖြင့်ဗုံးတစ်လုံးထပ်ချကာ တိုက်ခိုက်ခဲ့ကြောင်း ရေစကြို(ပကဖ)အဖွဲ့က ထပ်မံအသိပေးသည်။
ထိုသို့ ဗုံးကြဲတိုက်ခိုက်မှုကြောင့် စစ်ကောင်စီတပ်သားများ သေဆုံးထိခိုက်မှုရှိနိုင်ပြီး အသေးစိတ်အား ဆက်လက်စုံစမ်းကြောင်း ရေစကြို(ပဖက)အဖွဲ့က ဆိုသည်။
ဗုံးချတိုက်ခိုက်ရာနေရာများသို့ နာရေးကားများရောက်ရှိလာခဲ့ကြောင်း၊ တော်လှန်ရေးရဲဘော်များအထိခိုက်မရှိ ပြန်လည်ဆုတ်ခွာနိုင်ခဲ့ကြောင်း အသိပေးထားသည်။
ရေစကြို(ပကဖ)၏ ရုပ်သံတွင် သစ်ပင်အောက်ရှိ စစ်ကောင်စီတပ်သားများ ဒရုန်းဖြင့်တိုက်ခိုက်ခံရပြီးနောက် ထွက်ပြေးသွားကြသည်ကို တွေ့ရသည်။
ဖြစ်စဥ်နှင့်ပတ်သက်၍ ရေစကြို(ပကဖ)ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ရေစကြို(ပကဖ)အဖွဲ့သည် ပြီးခဲ့သည့် ဇန်နဝါရီ ၁၂ ရက်ကလည်း မဲစာရင်းပြုလုပ်နေသော လဝကရုံးကို မီးရှို့ခဲ့သေးသည်။