ထိခိုက်ဒဏ်ရာရသူရှိ၊ တိုက်ပွဲမရှိဘဲ လေကြောင်း တိုက်ခိုက်မှုများကြောင့် စစ်ရှောင်လေးဦး ဒဏ်ရာရ
ချင်းပြည်နယ် မင်းတပ်မြို့နယ် ပလိပ်ထွီကျေးရွာကို စစ်ကောင်စီတပ်က ယမန်နေ့ နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ရာ အရပ်သားများထိခိုက်မှုရှိခဲ့ကြောင်း မင်းတပ်မြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်သည်။
ဇန်နဝါရီ ၂၃ရက် နံနက် ၁၁နာရီခန့်တွင် မင်းတပ် မြို့နယ်၊ တိုက်နယ် (၂)အတွင်းရှိ ပလိပ်ထွီကျေးရွာရှိ လူနေအိမ်များနှင့် ကျေးရွာဘုန်းကြီးကျောင်းအား အကြမ်းဖက်စစ်တပ်မှ တိုက်ပွဲမရှိဘဲ တိုက်လေယာဉ်ဖြင့် ပစ်ခတ်ခြင်း၊ ဗုံးကြဲခြင်းများ လုပ်ဆောင်ခဲ့သည်ဟု ဆိုသည်။
လေယာဉ်ဖြင့်ပစ်ခတ်၊ ဗုံးကြဲတိုက်ခိုက်မှုကြောင့် လူနေအိမ် နှစ်လုံး ၊ ဘုန်းကြီးကျောင်း တစ်ကျောင်း၊ သိမ် တစ်လုံးပျက်စီးဆုံးရှုံးခဲ့ပြီး လေယာဉ်ဗုံးဆံကြောင့်ထိခိုက်ဒဏ်ရာရသူများလည်း ရှိကြောင်း အသိပေးထားသည်။ ထိခိုက်သည့် အရေအတွက်ကိုမူ ဖော်ပြမထားပေ။
လေယာဉ်ဖြင့် ပစ်ခတ်၊ ဗုံးကြဲခံခဲ့ရသော ရွာဘုန်းကြီးကျောင်းသည် မြို့နယ်စစ်ဘေးရှောင် (IDP) များကို ကူညီသူအရပ်သားများ (Volunteer)များ နေထိုင်ရာဖြစ်သည်ကြောင်း မင်းတပ်(ပအဖ)က ထုတ်ပြန်သည်။
ထိုသို့ဗုံးကြဲတိုက်ခိုက်မှုသည် ဘာသာရေးအဆောက်အဦကို တိုက်ခိုက်ရုံမျှမက အရပ်ဖက်စစ်ဘေးရှောင်များကိုပါ ရည်ရွယ်ချက်ရှိရှိ ဦးတည်တိုက်ခိုက်သည့် စစ်ကောင်စီ၏ အောက်တန်းကျသည့် လုပ်ရပ်ပင်ဖြစ်ကြောင်းလည်း ဖော်ပြသည်။
ထို့ပြင် နေ့လည် ၁၂နာရီခန့်တွင်လည်း မင်းတပ် မြို့ပေါ် အထိုင်ချထားသော ဟောင်ဝစ်ဇာ လက်နက်ကြီးများဖြင့် တိုက်နယ်(၂)ရှိ ကျေးရွာများကို ပစ်မှတ်ထား တိုက်ခိုက်ခဲ့ကြောင်း ထုတ်ပြန် သည်။
စစ်ကောင်စီတပ်သည် ပြီးခဲ့သည့် ရက်ပိုင်းကလည်း တိုက်ပွဲဖြစ်ပွားမှုမရှိဘဲ မင်းတပ်မြို့နယ် စွန်တောင်ရွာကို လေကြောင်းမှ ဗုံးကြဲတိုက်ခိုက်ခဲ့ခြင်း လက်နက်ကြီးဖြင့် ပစ်ခတ်ခြင်း လုပ်ဆောင်ခဲ့သည်။
ယခု ဇန်နဝါရီအတွင်း မင်းတပ်နယ်ရှိ ကျေးရွာများ၊ မင်းတပ် ချင်းကာကွယ်ရေးတပ်(CDF) တပ်စခန်းများကို စစ်ကောင်စီတပ်က လေကြောင်း တိုက်ခိုက်မှု ရှစ်ကြိမ်ပြုလုပ်ထားကြောင်း မင်းတပ် CDFက ယမန်နေ့တွင် ထုတ်ပြန်ထားပြီး ထိုသို့ တိုက်ခိုက်မှုများကြောင့် စစ်ဘေးရှောင်လေးဦး ထိခိုက်ဒဏ်ရာရခဲ့သည်ဟု ဖော်ပြသည်။
ပြည်သူများအနေဖြင့် ပုန်းခိုကျင်းများ တူးထားရန်၊ စစ်ကောင်စီ၏ လေကြောင်းအန္တရာယ်အား အထူးသတိပြုကြရန်လည်း မင်းတပ် CDFက အသိပေးထားသည်။